Муслиу најдобар фудбалер во Првата лига, Елмас најдобар во странство!

25.12.19 09:41

Репрезентативците на Македонија, Висар Муслиу и Елиф Елмас ги понесоа наградите за најдобри фудбалери во нашата земја и странство за годината која изминува. За најдобра фудбалерка прогласена беше Ленче Андреевска.

Поранешниот член на Шкендија, Муслиу се закити со наградата за фудбалер на годината во Првата лига. Тој со тимот на Шкендија стигна до титулата во македонскиот шампионат. Македонскиот бисер, Елиф Елмас е најдобар фудбалер во странство. Со квалитетните игри си обезбеди трансфер од Фенербахче во Наполи и место во една од најдобрите лиги во светот. Елмас и Муслиу имаат идентична желба која се вика пласман на Македонија на Европското првенство следната година.

Сакам да ѝ се заблагодарам на ФФМ и на сите во Шкендија, посебна благодарност до мојот тренер Ќатип Османи. Многу ми е драго што го добивам ова признание и се надевам дека сите заедно ќе славиме пласман на ЕП 2020. Сега е наше време. – изјави Муслиу.

Наградата за најдобар тренер ја освои Југослав Тренчовски од Академија Пандев, а посебното признание за животно дело замина во рацете на легендарниот коментатор Атанас Костовски. Најдобар судија во мак-фудбалот е Марјан Гоцевски од Струмица.