Живко Мукаетов е новиот претседател на Ракометната федерација на Македонија. Мукаетов беше избран со едногласна одлука на собранието и на престолот ќе го наследи Михајло Михајловски, кој е награден со почесен претседател на РФМ.
– Во овој проект влегувам со голем ентузијазам, како огромен љубител на спортот, темелен стратег и се надевам добар визионер. Ќе се потрудам македонскиот ракомет да функционира на поинаков начин отколку досега, дисциплина и напорна работа пред се, организациска структура со точно дефинирани одговорности, акцент на стратегијата од клупа…, кои верувам дека на долг рок ќе не донесат до посакуваните резултати. Да ги оставиме суетите на страна, да се сконцентрираме на конкретните задачи и за враќање на ракометот и во помалите градови, кои до пред извесно време важеа за спортски центри. Поседуваме солидна база, квалитет, што ќе треба само добро да се моделира – рече Мукаетов по назначувањето за прв човек на РФМ.
Машката ракометна селекција е на сред квалификацискиот циклус за Европското првенство во Данска, а за тоа свој осврт даде и новиот претседател Мукаетов.
– Еден месец е премалку за да можам да ветам дека ќе го испорачаме посакуваниот резултат, но по природа сум човек кој не се откажува, по природа сум борец и можам да ветам дека ќе дадам се од себе. Треба да бидеме реални: патот за Данска ни е многу трнлив и многу неизвесен. Знам дека јавноста е насочена кон истото, но работите треба да се гледа на долг рок. Успех и пласман на ЕП, но клучното прашање е што потоа – заврши Мукаетов.
Потпреседателите и другите тела на РФМ ќе се одбираат дополнително на собранието на Управниот одбор.
Мх.П.
Фото : Екипа.мк
