Најдобро сирење за пица во поглед на хемиските и физичките својства е италијанското кравјо бело сирење моцарела. Во студијата на новозеландските истражувачи од универзитетот во Окланд, објавена во американското списание „Журнал оф фуд сајанс“, се наведува дека италијанското свежо бело кравјо сирење моцарела задржува најдобра еластичност после термичката обработка при печењето на пицата. До овој заклучок се дошло после испитување на голем број разни врсти сирење, од англиското тврдо полумасно кравјо сирење Чедар до швајцарското гриер, кое се прави од необработено кравјо млеко.
Како би ги испитале видовите кравјо сирење при печењето, тимот експерти од Окланд користел камери и мокропроцесор кој го мерел стврднатиот површински слој, меурестиот дел и маснотијата на сирењето при термичката обработка во рерна. Најдобри својства задржала моцарелата, која останала најеластична и нараспространета. Чедарот ја губел еластичноста додека гриерот станувал премногу тврд после печењето, се заклучува во студијата.
