Познатиот италијански композитор, Енио Мориконе, е почестен од можноста да го отвори годинешното издание на фестивалот „Охридско лето“. На средбата со новинарите, денеска, тој најави незаборавна вечер на Античкиот театар. Како изненадување за публиката по завршувањето на концертот  се очекува да настапи музичкиот селектор на фестивалот Гордана Јосифовска – Неделковска, која во придружба на оркестарот и под диригентска палка на маестро Мориконе, на обоа ќе изведе сегмент од филмот „Мисија“.


Мороконе кој од вчера престојува во Охрид е воодушевен од природните убавини на градот. „Избегнувам да давам премногу комплименти, но ова е еден посебен град, посебно место и тоа сакам да го нагласам во оваа прилика“, рече Мориконе. Тој кажа дека заедно со неговата сопруга уживале во македонската кујна и локалните специјалитети што имал можност да ги проба, како јагнешкото, рибата, салатите, јогуртот…


Големиот композитор  го поздрави министерката за култура Елизабета Канчевска – Милевска, а во знак на сеќавање на неговото гостување во Охрид директорот на Фестивалот Тони Симоновски на Мориконе му врачи охридска резба со ликот на Патронот на градот – Свети Климент Охридски.


Фестивалот Охридско лето ќе биде отворен вечерва со музичкиот спектакл „Беше еднаш во Македонија“, во чии рамки унгарската филхармонија „Гјер“ ќе изведе петнаесетина теми од познати филмови за кои музика компонирал оскаровецот Мориконе.

Ohridnews