Тимот од Автокоманда во Охрид на 22-то издание од Купот на Македонија ќе ја брани титулата освоена минатата сезона во „Кале“. Во досегашната историја „металурзите“ трофејот од Купот го освојувале пет пати од кои четири во последните пет години.
– По решавањето на прашањето околу титулата во националниот шампионат моите соиграчи фокусот го сменија на Купот на Македонија. Купот е и треба да биде предизвик за секој ракометар бидејќи тоа е второ по ранг натпреварување во нашата земја – рече Наумче Мојсоски капитен на Металург.
Градскиот ривал Вардар против Металург во Охрид ќе има мотив повеќе откако „пиратите“ ја добија битката за титулата во Супер лигата.
– Секако дека ќе горат од желба за реванш, но и ние имаме мотив бидејќи во Охрид ќе ја браниме титулата. Има едно спортско правило дека тешко е да освоиш титула, но уште многу потешко е да ја одбраниш и тука е нашиот мотив – додаде Мојсоски.
Мојсоски во Купот на Македонија медалот го освојувал шест пати од кои четири со Металург, а еднаш со Пелистер и Вардар.
– Секое издание во Купот на Македонија си има своја приказна. Не секогаш победувал подобриот или подобро пласираниот на табелата. Често имаше изненадувања затоа предизвикот во Охрид треба да се прифати со мирни глави и со две раце – заврши Мојсоски, кој поради повреда ќе го прескокне овогодинешното издание.
На патот до финалето на „металурзите“ им стои тимот на Зомимак додека во втората полуфинална двојка ќе се сретнат Вардар и Тинекс Пролет. Полуфиналињата се в сабота во 15 односно 17:45 часот, а финалето в недела во 17:45 часот.
Мх.П.
