Масовните тепачки и поделби во изминатите неколку месеци, учениците од различни етникуми од Струга ги оставија зад себе и здружено побараа подобрување на условите за спорт и рекреација во градот. Под мотото „Прсни ме да се разбудам“, учениците од средношколските центри „Ибрахим Термо“ и „Нико Нестор“, денеска кај женската плажа во Струга организираат 12 часовен хепенинг на кој низ спортски натпревари и дружење и мини концерти ќе го искажат своето незадоволство од состојбата во која се наоѓа затворениот градски базен и недостатокот на спортски активности во Струга.



младите стружани сакаат спорт а не поделби

Доколку младите имаат заедничка цел се здружуваат, а проблемите какви што во изминатиот период се случуваа во средните училишта во градот настануваат од недостиг на заедничко дружење и непознавање на едни со други, сметаат учениците од различните етнички заедници. Според нив преку спортот и други заеднички проекти може успешно да се гради соживотот во Струга.


Можеме заедно велат учениците

Според Џејми Хајредини, раководител на секторот за образование при локалната самоуправа во Струга, ваквите настани почесто треба да се организираат за да не се повторат проблемите во училиштата, кои како што рече, можеби се производ на однесувањето на постарите и политиката. Тој најави дека локалната самоуправа во летниот период ќе организира повеќе заеднички дружења на младите од различни етнички заедници со цел да се надминат проблемите кои  доведоа до поделба на учениците и од наредната школска година тие повторно да учат заедно.


Џејми Хајредини најави дека учениците во „Ибрахим Темо“ и  „Нико Нестор“ ќе учат заедно

Целта е на овој начин да се развие критичко мислење кај младите и да се дискутира отворено за проблемите кои ги имаат средношколците, ни изјави Еди Ќела локален координатор на проектот кој го организираат членовите на младинските секции на средните училишта во Струга со поддршка на Институтот отворено општество Македонија,, Образовниот форум, ОБСЕ , невладината организација „Аква“ и локалната самоуправа.

Г. Момироски