Дури 33 кошаркарски школи што во моментов се натпреваруваат во младинските категории, а немаат сениорски тимови, ќе се најдат пред згаснување ако, утре, членките на собранието на Македонската кошаркарска федерација (МКФ) го усвојат новиот правилник за лиценцен систем и за категоризација на кошаркарските клубови, школи и други субјекти што се занимаваат со кошарка, пишува “Нова Македонија“ во денешното издание.
Според многу стручњаци, појавата на еден куп приватни школи, каде што најчесто се работи неплански, нестручно, без вистинска селекција, е главната причина за огромниот пад на младинската кошарка во Македонија. Досега немаше никакви критериуми за тоа кој може да отвори школа за кошарка, поради што речиси во секое основно и средно училиште, како печурки изникнаа огромен број приватни кошаркарски тимови наменети исклучиво за пионери, кадети и младинци. Со децата често работат приучени тренери, без однапред утврдена план и програма, а за тоа малите вљубеници во кошаркарскиот спорт плаќаат помеѓу 1.000 и 2.000 денари.Во иднина лиценци ќе мораат да извадат сите клубови, а нејзиниот износ ќе зависи токму од бројот на младински екипи што се натпреваруваат во системот на МКФ. Лиценцата А, која треба да ја имаат сите оние тимови што сакаат да се натпреваруваат на сениорско ниво, може да биде бесплатна ако клубот има пријавено најмалку шест екипи во младински категории. Во зависност од тоа дали клубот има од една до пет младински екипи цената на лиценцата ќе се движи помеѓу 6.000 и 10.000 денари. Лиценцата А најскапо ќе чини за клубовите што воопшто немаат младински погон. Тие ќе треба да платат 5.000 евра на годишно ниво.
