Новиот пакет мерки за заштита од ширење на Ковид-19 кој треба да почне да се применува од 16-ти август значително ќе го погоди угостителскиот сектор. Угостителите затечени од тоа како се поставени мерките. Велат дека не им е доволно објаснет начинот на спроведување на истите. Бараат одговор, зошто повторно товарот за ширење на заразата паѓа на угостителите и по кои параметри угостителските објекти се извор на зараза кога има други сектори во каде што движењето во група е неконтролирано, но засега за нив нема никаков сет мерки.
Прво на посетителите да им се бараат сертификати, не е толку едноставно. Самото поставување редар, засега, во угостителскиов сектор изгледа како невозможна мисија. Од друга страна, идентификација во нашава земја може да побара само униформирано лице од МВР, понатаму тука е Законот за заштита на лични податоци, моментот на дискриминација, така да сметам дека можеби некако е избрзана работава. Ни преостанува во оваа недела до имплементација на овој пакет мерки да ги повикаме надлежните активно да се вклучат во детално образложување како тие мерки ќе бидат спроведен. Би било добро и да ни ги кажат причините зошто ние повторно сме на удар со ваквите мерки. – вели Михаил Мишев, претседател на Здружение на угостители Охридски Еснаф.
Задолжителното поставување на редари ќе падне на товар на угостителите, а од друга страна како што велат, ќе се соочат со намален капацитет. Редарската служба покрај дополнителен трошок ќе значи и создавање на поголем метеж за влез и излез од објектот, но и дискриминација на гостите вели Мишев. Додава дека Охрид го надмина моментот кога имаше најголема концентрација на луѓе, дури и над капацитетите кои може да се менаџираат, а рестрикциите се носат во моментот кога е почувствувано релаксирање. По овој период, очекувањата дека секторот може да заживее и делумно да се пополнат загубите од минатата година, со новите мерки паѓаат во вода.
Останува нејасно во моментов дали мерките ќе важат само за организирани прослави како што е наведено, родендени, музички хепенинг или и во секојдневното работење. Голем дел од угостителите се вознемирени бидејќи може да им биде нарушено секојдневното работење. Во секој случај, надежта ни згаснува, затоа што очекувавме сите „дупки“ од неработењето во кинатото да ги затвориме по повторното отворање. Прво бевме погодени со комплетно затворање на објектите, па потоа следеше период на редуцирано работење и сега кога мислевме дека ова лето, баш од овој период натаму остатокот од сезоната ќе се одвива порелаксирано, се случува ова, додава Мишев.
Факт е дека Охрид е преполн, а со овие мерки ќе се обесхрабрат оние кои сакаат да го пролонгираат својот одмор во најголемиот туристички центар во држвава, вели Мишев
Во охридското угостителство навистина ќе биде почуствувано намалување на прометот, ќе ги избркаме гостите, освен ако за работење без настан објектот си функционира нормално, освен затворениот дел. Тогаш може и некако ќе успееме да се справиме, меѓутоа и тоа ќе биде тешко, затоа што навистина има прилив на гости и ќе се доведеме до ситуација да ги враќаме назад. На еден угостител најнепопуларното нешто што може да му се случи е и покрај желба да го смести гостинот да мора да го врати назад. – истакна Мишев.
Новите мерки и рестрикции предвидуваат дека од 16-ти август целосно се забранува работа на угостителските објекти на затворено и се забранува работа и организација на секаков вид на настани за затворено во угостителски објекти. Лицата над 18 години задолжително ќе мора да приложуваат документ за извршена имунизација со најмалку примена една доза вакцина.
Кристина Алексиеска
