Министерот за здравство, Никола Тодоров, најавува отстранување на аномалиите кои досега постоеле во здравството.
Нагласи дека надлежното министерство ќе се сконцентрира особено на работењето на директорите на здравствените институции чие менаџирање постојано ќе се контролира, особено нивното справување со долговите, како и несовесното работење на вработените за кое ќе следуваат санкции.
Тодоров посебно се осврнува на листите на чекање. Има сознанија дека таквите листи се неформални и дека во некои клиники, имињата на пациентите кои чекаат за преглед или операција се напишани на обично ливче, потег кој некои доктори самоиницијативно го превземаат.
-Она што сега е фактичка состојба е дека таквите листи на чекање воопшто не се транспарентни. Тоа отвора широка можност за интервенирање внатре во листите, што отвора можност за корупција, истакна Тодоров.
Неговата примарна цел е да изгради здравствен систем кој ќе одговори на сите предизвици и аномалии кои ги има денес, на чие отстранување ќе се работи во идниот период.
