Минимален пораз на ГРК Охрид на отворањето на сезоната во Супер лигата (фото галерија)

Во неизвесен финиш ГРК Охрид загуби на гостувањето во Скопје од РК Бутел 24:23 (11:10), во натпревар од 1 коло од ракометната Супер лига.

„Гладијаторите“ можат да жалат, бидејќи пропуштија можност да ја отворат сезоната со позитивен резултат. Охрид имаше предност од +4 гола во 45 минута, но грешките во финишот традиционално незгодниот Бутел максимално ги казни и забележа минимален триумф.

Домаќините подобро го отворија мечот. Поведоа 3:1, па 5:3, но Охрид не дозволи Бутел резултатски да се одлепи. Во 25 минута беше 9:8, а на полувреме 11:10.

Во вториот дел Охрид ја сврте играта, а и резултатот. Со два гола уште на стартот го презеде водството 11:12, во 34 минута поведе со +2, потоа со 3, а во 45 минута и со +4 (15:19). Бутел не се предаваше и почна да ја топи предноста на гостите. На 5 минути до крајот беше егал 21:21, по што се играше гол за гол. При водство на Бутел 23:22 Охрид со играч повеќе на теренот направи грешка во напад по што прими гол од речиси невозможна ситуација, што на крај го чинеше пораз.