Селекторот на македонската фудбалска репрезентација, Благоја Милевски е задоволен од изданието на неговите избраници на вечерашниот натпревар со Исланд.
Тој им го честиташе пласманот во баражот на репрезентативците за кои е убеден дека располагаат со квалитети за поголеми успеси.
Милевски на прес-конференцијата по натпреварот во Скопје, не заборави да ја истакне и заслугата на претходниот селектор со кого македонската репрезентација ги започна квалификациите за Мундијалот 2022.
Честитки до моите фудбалери. За успехот е заслужен и мојот претходник Игор Ангеловски и играчите кои беа дел од овој квалификациски циклус. Раниот гол на Алиоски ни ја олесни работата. Исланд е сериозна репрезентација и бевме свесни дека до крајот моравме да бидеме максимално концентрирани. Ние доминиравме во текот на целиот меч и задоволен сум од сите кои добија шанса. Сепак ќе кажам дека не сме стигнати до нивото кое јас го посакувам. Имаме потенцијал да напредуваме уште и сите се ставени во функција на такво нешто. Јас уште од самото доаѓање на селекторската функција верував во квалитетите на нашите фудбалери и тие целосно ја оправдаа довербата, рече Милевски.
Македонските фудбалери го освоија второто место во Ј-групата во квалификациите за Светското првенство 2022 во Катар и за првпат во историјата изборија учество во баражот.
Ждрепката за групите во плејофот ќе биде извршена на 26 ноември, а натпреварите ќе се играат во март следната година.
OhridNews
