И покрај високите температури, во охридското Одделение за итна медицинска помош не е зголемен бројот на граѓани кои се обратиле. “ Дневно имаме по неколку јавувања, но не може да се каже дека тие се многу повеќе од колку вообичаените за овој период од годината”, велат од ова одделение. “ Деновиве вршиме интервенции поради доживеан колапс, изгоретини и црвенило на кожата, главоболки, но не и за посериозни тегоби. Најверојатно причината е што во Охрид температурите и не се толку високи како во останатите градови низ земјава” , објаснуваат од Одделението за итна медицинска помош.
Лекарите препорачуваат да се избегнува директен престој на сонце, какви било напорни активности, да се престојува во затворени простории, пред се климатизирани, да се носи светла и лесна облека, а на сонце да се излегува со заштитни очила и капа. Да се внесуваат помали количини храна, а повеќе течности и да се избегнуваат алкохолни и пијалаци кои содржат кофеин.
При привремено излегување од возилото да се отвори прозорецот за да се овозможи вентилација и да се не остава никого во автомобилот. Посебно дисциплинирани треба да бидат хроничните болни, особено оние со болести на срцевосадовиот систем, невролошките и белодробните болести и за сите промени во здравствената состојба задолжително да се консултира матичен доктор, а почесто во денот да се проветруваат просториите.
