Македонци проектираат метро во Лондон

06.08.08 00:38

Прилепчанецот Оливер Кузманоски кој веќе 11 години престојува во Англија каде по завршувањето на машинскиот факултет отворил сопствена компанија за планирање и консалтинг работи на проектирање на метро и други сообраќајни решенија во Лондон. Ангажирани сме во проектот за изградба на автобуски линии и метро во Лондон во должина од 45 километри, вели во разговор за Оhridnews, Оливер. Тој деновиве заедно со својата сопруга престојува во Охрид на манифестацијата „Заедно дома во Македонија“.

^{Оливер со сопругата}

Оливер е еден од многуте успешни македонци во Англија. Таму тој е оженет за македонка од Кочани, која ги привршува студиите во Лондон. Цел им е да изградат кариера во Британија, по што би сакале да се вратат во татковината. Кузманоски смета дека Македонија е перспективна држава, и дека не треба да се критикува државата. Погрешно е споредувањето на Македонија со развиените земји во кои работиме, затоа што Македонија иако има богата историја сепак како држава во развој е многу млада и таа оди по својот пат, вели Оливер.

Слично размислува и Тони Петроски, кој на привремена работа во Англија е веќе 15 години. Тони работи во англиското министерство за правда и е член на УО на Асоцијацијата на македонците во Обединетото кралство. Како и другите македонци на островото и тој ја користи секоја можност да лобира за својата татковина. Најбитни се контактите со политичарите и дипломатите. Ние иако сме мала заедница се обидуваме што е можно повеќе да се избориме за британска поддршка на Македонија, вели Петроски.

^{Тони Петроски}

Инаку Оливер и Тони во Охрид ги бранеа боите на македонците од Велика Британија на турнирот во фудбал на кој учествуваа тимови од 7 држави. Манифестација ,,ЗАЕДНО ДОМА ВО МАКЕДОНИЈА што во организација на здружението „Корени“ се одржува во Охрид, ќе биде заокружена денеска со прес конференција на која ќе бидат доделени и наградите за победниците во фудбалското првенство.