Македонските најдобри каратисти од нашите најреномирани карате клубови ,,Макпетрол и Металург,, интензивно ги привршуваат подготовките пред да заминат за Турција, Истанбул и да земат учество на четвртиот по ред турнир од ,,Светската 1 Премиер Карате Лига,, за најдобрите светски карате сениори. 

После првите три турнири кои се одржаа во Парис, Ротердам и Џакарта нашите каратисти имаат многу солидни пласмани на рејтинг листата од ова најелитно натпреварување во карате спортот. Важно е да споменеме дека сите Македонски сениори го пропуштија третиот по ред турнир кој се одржа во Џакарта, но и покрај тоа пред се поради освоените медали на првите два турнири во Парис и Ротердам тие имаат многу високи позиции. 
Огнен Груевски категорија -84 кг, е нашиот најдобро рангиран каратист во овој момент,тој е прво рангиран со вкупно освоени 744 бодови, после него следуваат Јарослав Коруна од Украина со 552 бодови и Диего Ванде од Белгија со 520 бодови.
 
Во категоријата +84 кг имаме уште еден Македонски каратист кој е високо рангиран тоа е Жарко Арсовски во категоријата +84 кг. тој во моментов е на втората позиција со вкупно 712 бодови, пред него на првата позиција е актуелниот европски првак Џонатан Хорне од Германија со вкупно 784 бодови , додека трето рангиран е Французинот Ибрахим Гари со 582 бодови.
  
Кај девојките најдобро пласирана во досегашните натпревари е младата каратистка на Макпетрол Наташа Стефановска во категоријата -61 кг . таа се наоѓа на високата трета позиција со 424 бодови, на првата позиција е европската првенка Австријката Алиса Бушингер со 1178 бодови додека на втората позиција е Натали Вилијамс од Англија со 560 бодови.

 
Наташа Стефановска ќе биде спречена да замине на турнирот во Истанбул бидејќи таа постоперативно успешно закрепнува од повредата која ја здоби на вториот турнир во Ротердам (скинат преден вкрстен лигамент на десниот коленски зглоб). За од прилика еден месец очекуваме нејзино потполно закрепнување и успешно продолжување на активностите и натпреварите во Светската карате лига.
 
Нашата најдобро рангирана спортистка и голем победник во Премиер карате лигата за минатата година Наташа Илиевска се наоѓа на осмата позиција во категоријата -55 кг со освоени 312 бодови. 
Минатогодишниот најдобро рангиран Македонски спортист и голем победник во 1 Премиер карате лига,  Мартин Несторовски во тешка категорија +84 кг, во моментов е на 13 позиција со 192 бода. Иво Цветковски и Ферат Корбуличи во категоријата -75 кг се наоѓаат на 19 позиција двајцата имаат по 160 бодови, додека пак Богдан Мицов е 13 рангиран со 256 бодови. Послабо рангирани се каратистите: Стојан Тасевски во моментов е на 20 позиција со 144 бодови, Симон Антич е на 52 позиција со 64 бодови и Томе Тодоровски е 53 рангиран со 64 бодови.
Македонските каратисти кои се членови на клубовите Макпетрол и Металург за Турција ќе заминат заедно во Петок 31.Авг.2012 година. Тие ќе бидат предводени од нашите тренери Бошко Заборски и Мирче Јанушевски.
 – Турнирот во Истанбул за нашите сениори значи и прва официјална контрола за темпирање на формата пред претстојното Светско првенство кое треба да се одржи од 21-25.ное 2012 год. во Парис. До започнување на светското првенство клупските планови и програми предвидуваат настапи и на петтиот турнир кој треба да се одржи во Франкфурт Германија на 22.Сеп.2012 год. Потоа предвидени се учества на два Светски карате купови кои треба да се одржат во Атина (Октомври) и во Москва (Ноември). Мислам дека учеството на овие првенства и светски купови ќе биде доволно за темпирање на спортската форма за сите оние спортисти кој ќе обезбедат пласман за настап на Светското првенство во Парис и ќе ја преставуваат Македонија – изјави/тренерот на Карате клубот Макпетрол, Бошко Заборски.