На 35тата генерална конференција на УНЕСКО, што изминатиот викенд се одржа во Париз, организацијата застана зад два исклучително важни програми во областа на заштитата на природните реткости.
Имено во првата од резолуциите беше прифатено зголемувањето на буџетот на УНЕСКО за програмата човек и биосфера (МАБ) што ќе значи поголем интерес и можности за проекти од областа на животната средина и биодиверзитетот. УНЕСКО со втората резолуција побара и се вклучи во глобалната акција за климатските промени, кои имаат исклучително негативно влијание врз условите за живот на човештвото и врз развојот на светот воопшто, вели Дејан Паноски од Минсиетерството за животна средина, кој како претставник на Македонија учествуваше во работата на Генералното собрание.
– Климатските промени дефинитивно ќе имаат сериозни импликации врз економските , социјалните и културолошките вредностри на човештвото како што се правото на живеење , на здравје, храна, вода и живеалиште. Затоа заклучено е напорите да се фокусираат на едукацијата и подигање на свеста околу влијанието на климатските промени, истакна Паноски.
На микро ниво тоа ќе значи поголема кампања за еколошките проблеми , но и квалитетни мерки во урбанизацијата, планирањето , користењето на водените ресурси, квалитетот на воздухот, развивање на нови технологии. Македонија според можните сценарија набрзо би навлегла во сушна зона и затоа е потребна брза реакција согласно усвоената национална стратегија, смета Паноски.
