Македонската ракометна репрезентација се најде на 13. место на најновото рангирање на Европската федерација. Високиот пласман се должи на освоеното петто место на континеталниот собир минатиот месец во Србија.
Благодарение на високиот пласман Македонија при извлекувањето на квалификациските групи, за ЕП 2014 во Данска, ќе биде сместена во вториот барабан заедно со селекциите на Чешка, Австрија, Унгарија, Норвешка, Шведска и Словенија.
Во првиот барабан се сместени носителите на групите: Хрватска, Германија, Шпанија, Франција, Исланд, Полска и Србија.
Ќе бидат формирани седум групи со по четири репрезентации, се игра на принцип секој со секого дома-гости, а двете најдобро пласирани обезбедуваат пласман на шампионатот.
Извлекувањето на групите ќе се одржи на 20. април во данската престолнина Копенхаген.
М.П.
