Сообраќајот во охридско се одвива отежнато и во зимски услови. Граѓани кои попладнево тргнале на пат реагираат дека не е чист магистралниот пат Охрид – Кичево. На коловозот има снег, поради што на возачите им се препорачува крајно внимателно возење и прилагодување на брзината кон условите на патот.
Забрана за тешки товарни возила има на патните правци Гостивар-Кичево преку Стража и на патниот правец Маврово-Дебар.
Како што соопшти АМСМ, на овие патни правци има поголеми остатоци од снег на коловозите и за патничките возила се препорачува исклучително внимателно возење и прилагодување на брзина на движење поради можноста од пролизгување.
На превоите Пресека, Буково, Ѓавато и Плетвар засега нема забрани за движење на возилата, но и таму снегот се задржува на коловозот.
Сообраќајот на останатите магистрални и регионални патни правци се одвива отежнато и во зимски услови поради врнежи од снег.
АМСМ препорачува внимателно возење и низ клисурите на почестата појава на поситни одрони, особено на патните правци Маврово-Дебар, Катланово–Велес и Демир Капија-Удово.
Метеоролозите најавуваат ниски минимални температури во недела, кои на места ќе се спуштат до -11 степени Целзиусови. Дневната максимална температура нема да достигне повеќе од 5 степени.
Ohridnews
