ЛШ: Вардар ги освои бодовите, Марко Кизиќ симпатиите во „Јане Сандански“ (видео)

Ракометарите на Вардар ставија точка на серијата од два порази во Лигата на Шампиони совладувајќи го Брест Мешков со 36-31 (19-17) во шестата рунда од групната фаза.

„Црвено црните“ со триумфот на домашен терен се искачија на втората позиција на табелата прескокнувајќи го Киелце, кој е следен ривал во ЛШ.

„Вардарци“ на теренот ја оправдаа фаворитската улога водејќи од почетокот до крајот на мечот. Разликата на семафорот започна од 2-3 погодоци па се до осум. На крајот, стоеше 36-31 за составот на Вардар, кој ја забележа четвртата победа сезонава.

Победата на Вардар најмногу ја зачини младиот голман Марко Кизиќ. Чуварот на мрежата на Вардар шанса доби во последните 15-тина минути и максимално ја искористи. Помеѓу неколку одбрани за издвојување е двојната интервенција која ја запали публиката во СРЦ „Јане Сандански“.

Голгетерски се истакнаа Даинис Криштопанс со 9 голови, Иван Чупиќ со 7 голови и Сташ Скубе кој постигна 6 погодоци. Во гостинскиот состав најпрецизен беше Микита Ваилупау со девет погодоци.

OhridNews