Првпат по пет сезони, полскиот Киелце успеа да триумфира во Скопје, победувајќи го Вардар со 29:33 (13:16), искачувајќи се на првото место во групата А со дури пет победи.
Вардарци имаа одлични моменти во средината на второто полувреме, ама ја испуштија шансата да го земат мечот под своја контрола. Тимот настрада од „своите“, поранешните играчи Алекс Душебаев и Игор Карачиќ. Првиот беше феноменален кога се говори за постигнувањето на головите, додека вториот беше главен асистент и го разигруваше својот тим. Киелце со овој триумф останува лидер и е најдобар тим во групата во ЛШ. За полскиот првак ова е прва победа во Скопје во пет години (три порази и едно реми во меѓусебните пресметки).
Вардар имаше фантастичен старт, поведувајќи со 5:1, но гостите успеаја да се вратат и да израмнат на 9:9, а на полувреме отидоа со три гола разлика (13:16). Во второто полувреме, Вардар успеа да се врати и да поведе со 22:21, но предводени од поранешните вардарци, Алекс Душебаев и Игор Карачиќ, Киелце се вратија на три гола предност (23:26).
Душебаев беше посебно загреан за игра против „црвено-црните“ со 10 постигнати голови, додека кај Вардар, Јотиќ имаше шест, а Чупиќ и Дибиров по пет гола.
Киелце има одиграно дури седум кола во ЛШ и е на првото место со пет победи, додека Вардар по четири одиграни меча има една победа, едно реми и два порази, и наскоро ќе има шанса за одмазда со гостувањето во Полска на 25 ноември.
OhridNews
