Летната тераса на која во саботата од струен удар загинаа тројца угледни граѓани на Струга, иако немала дозвола за работа не била затворена, затоа што немала врата. Ова апсурдно објаснување го даде министерот за економија Фатмир Бесими.
– Констатирано е дека објектот работел незаконски и случајот сега е пред судовите. Што се однесува до тоа зошто не бил затворен објектот, доколку има врата може да се пломбира, а доколку нема врата нема и како да се пломбира – изјави министерот Бесими.
Од одговорност се оградува и локалната самоуправа, според која надлежност во случајот имаат пазарната, трудовата и санитарната инспекција. Државата пак појаснува: издавањето дозвола за поставување на урбана опрема е во надлежност на локалната самоуправа.
Полицијата против тројцата сопственици на летната тераса на која се случи несреќата, во понеделникот поднесе кривична пријава за предизвикување тешки дела против општата сигурност. Засега тие се единствените осомничени за големата трагедија, а локалната самоуправа и државата со меѓусебни обвинувања се амнестираат од одговорност.
