Најдобриот македонски ракометар Кире Лазаров може да влезе во историјата на ракометната ЛШ, како единствен играч што успеал двапати да биде најдобар стрелец.
На еден меч пред завршувањето на ЛШ, Лазаров, кој игра за Загреб, е прв стрелец со 96 гола, пред Кристијан Ал од Кил со 86 и Никола Карабатиќ од Кил со 83 гола.
По првиот финален меч меѓу Сиудад Реал и Кил, во кој Германците како гости победија со 29-27, Никола Карабатиќ со 9 постигнати гола го водеше актуелниот европски првак до победата.
Во изјава за дневниот весник “Дневник“ Лазаров вели – Сега кога е ваква ситуацијата штета би било да не бидам прв стрелец. Лично за мене би било уште едно големо признание, со оглед на тоа дека конкуренцијата, која ме следи, има и четири меча повеќе. Процентуално гледано јас сум најдобар, а и морален победник сум. Работев напорно и тренирав цела сезона. Се надевам дека ќе ми се врати вложениот труд .
Како член на Фотекс во сезоната 2003/04 Лазаров за прв пат се најде на листата на најдобрите 50 стрелци, постигнувајќи 39 гола.
Во сезоната 2004/2005 тој беше четврти со 76 гола (играше во 1/4 финале).
Кире најдобар беше во сезоната 2005/2006, кога првпат играше полуфинале, со Веспрем. Со 85 гола беше прв стрелец во ЛШ.
Минатата сезона испадна во четврт-финалето и заврши како трет со 82 гола.
