ОВР Струга поднесе кривична пријава против струшкиот градоначалник поради постоење основи на сомнение за сторено кривично дело „несовесно работење во службата“.
Тој, во својство на градоначалник на општина Струга, на 30.05.2018 и на 01.04.2024 донел решение со кое едно лице од струшкото село Подгорци, од библиотекар го именувал за директор на основното училиште во истото село. Пријавениот го направил тоа иако знаел дека лицето нема соодветно образование и не исполнува повеќе услови од Законот за основно образование, немал најмалку пет години работно искуство во училиштето, не го положил испитот за директор во утврдениот законски рок, немал приправнички стаж и не поседувал соодветен сертификат за познавање на англиски јазик, информираат од МВР.
Овие неправилности, додаваат, биле утврдени при контрола на Државниот просветен инспектор, извршена на 20.06.2024, при што дополнително било констатирано дека пријавениот, после донесување на одлука на училишниот одбор, не објавил оглас за избор на директор со што, на лицето противправно му овозможил да добие решение за в.д. директор и остварување парична корист кои му биле исплатени по основ на плата и придонеси.
OhridNews
