Охрид е домаќин на Конференцијата- “ Надминување на регионалните диспаритети” која се одржува во организација на Министерството за локална самоуправа.Присутни се околу 120 учесници- министри, претставници на надлежни институции и организации од 16 земји од Југисточна Европа и од Кавкаскиот регион.
Целта на дводневниот собир, кој се одржува со поддршка на Германското друштво за техничка соработка (ГТЗ) е да се изнајдат начини како да се постигне подобро спроведување на регионалните политики усогласени со Европската унија, како и да се укаже на растечката важност на регионалната политика на ЕУ, како и потикнување процеси на дискусии и размени на искуства меѓу Унијата, нејзните членки, земјите кандидати и соседните држави од ЈИЕ и Кавкаскиот регион.
Обраќајќи се пред учесниците на конференцијата, министерот за локална самоуправа Муса Џафери истакна дека развојот како приоритет на политиката на Република Македонија, е условен од усогласувањето на националната политика со онаа на ЕУ.
Потсетувајќи дека Унијата своите политики ги имплементира токму преку регионите, министерот Џафери, истакна дека регионалната развојна политика Република Македонија ја насочува кон намалување на диспаритетите меѓу одделните плански региони внатре во државата, но и помеѓу оштините во рамките на одделните региони.
Од собирот во Охрид се очекува да бидат излечени заклучоци кои ќе бидат преточени во „Охридска агенда за регионална политика во ЈИЕ и Кавказот“, документ што ќе биде формално доставен до надлежнитеинституции на ЕУ.
Ohridnews
