Ј.П. „Охридски Комуналец“ – Охрид, во наредниот период ќе предложи измени во начинот на наплатата на услугите од граѓаните, а во тоа ќе се применат некои искуства кои успешно се имплементирале во Бугарија и Грција. Исто така се предвидува јавното претпријатие да склучи договор со Локалната Самоуправа со кој општината на Комуналец ќе му плаќа за собирањето на сметот, а таа средствата ќе ги прибира преку други давачки или со наплата на ѓубретарина. Ова го изјави в.д. директорот на Ј.П Комуналец, Боро Павлоски во емисијата Соочување со Љупчо Таневски, на Радио Охрид.
– Комуналец најголем проблем има со наплатата на сметките, тоа се прави од разни причини, не само од неажурност, туку и поради тоа што бројни граѓани се иселуваат од градот без да го пријавуваат тоа, а ние и натаму испоставуваме сметки на кои плаќаме ДДВ, што е дополнително финансиско оптоварување за нас. Затоа мислам дека идејата Комуналец да склучи посебен договор со Локалната самоуправа е добра и треба да се размислува во тој правец. Тогаш облигационите односи ќе се со Локалната самоуправа, која ќе плаќа за услугите на комуналното претпријтие, а средствата за тоа таа ќе ги обезбеди на некој друг начин – изјави Павлоски.
Павлоски рече дека со ова практично Охрид ќе ја отвори вратата за приватниот сектор во сферата на јавната хигиена и подигање на сметот, и така ќе се овозможи создавање конкуренција во работата со отпад, а одржувањето на јавната чистота во градот ќе стане бизнис. Тоа според Павлоски ќе резултира со подобар квалитет на услугите.
– Приватизацијата на Комуналец е нешто неминовно, тоа е предвидено и со законска регулатива за Јавно приватно партнерство и тоа ќе се случи, дали за време на мојот мандат или подоцна, конкуренцијата ќе дојде и работата со отпад ќе е бизнис како секаде во развиениот свет – рече Павлоски.
