Истражниот судија, Весна Кичеец, го комплетираше предметот за броддската несреќа од 5-ти септември. Тој содржи изјави од очевидци и преживеаните патници, сегменти од бродската книга, фотографии, видео материјали и записници од бродскиот регистар и техничкиот преглед на бродот „Илинден“. За време на истрагата биле сослушани и двајцата капетани и сопственикот на бродот „Александрија“ и заповедникот на бродот „Кристина“ кои први стигнаа на местото на несреќата, а изјави пред истражниот судија дадоа и сегашниот и поранешниот капетан на Капетанијата, Настоски и Клечкароски, како и овластениот претставник на германската осигурителна компанија „Лојд“, Бранко Баиќ.
Комплетната техничка документација им е испратена на вештаците од Машинскиот факултет во Скопје. Истражниот судија очекува по нејзиното разгледување вештите лица да пристигнат во Охрид и да започнат со вештачење на бродот „Илинден“кое треба да ги открие причините за несреќата што се случи на 5-ти септември. После вештачењето целиот предмет ќе биде предаден на Основното јавно обвинителство во Охрид кое треба да одлучи дали обвинителниот акт ќе биде проширен и на други лица.
Засега единствено за несреќата во која загинаа 15 бугарски туристи се товари капетанот на бродот, 23-годишниот Сотир Филески против кого МВР поднесе кривична пријава за тешко дело против безбедноста на луѓето и имотот во сообраќајот. Кривичниот совет при Основниот суд во Охрид вчера го продолжи притворот на Филевски, за уште 30 дена.
