Компанијата Кока Кола повторно ја вратила црвената боја на своите лименки откако нивниот бел дизајн, воведен по повод новогодишните празници, бил критикуван од купувачите. Познатиот бренд ги лансирал белите лименки како дел од кампањата за заштита на поларните мечки и нивните живеалишта. Меѓутоа, бројните купувачи го критикувале тој потег, тврдејќи дека лименките премногу личат на сребрените лименки за диетална кока кола.
Некои љубители на овој пијалок отишле и до таму што тврделе дека во новото пакување кока колата има поинаков вкус. Во компанијата навеле дека немаат намера белите лименки да ги повлечат од пазарот, туку со додавање на црвени да ја остварат целта на кампањата за заштита на поларните мечки, а од друга страна и да одговорат на барањата на потрошувачите. Кока Кола веќе испорачала на пазарот повеќе од милијарда бели лименки, а новите, стандардно црвени, би требало да се вратат на пазарот наредната седмица.
