Информациите за нови случаи на труење на кучиња во Охрид, со право ја вознемирија јавноста. Во 21 век во Охрид некој применува методи од минатиот па дури и од предминатиот век за да се справи со проблемот со кучињата скитници. Но, дали се справува? Секако дека не. На овој начин само се валка угледот на најголемиот туристички центар кој треба да предничи во се пред другите градови во земјата, па и во решавање на проблемите со животните.
Загрижува тоа што Охрид денес нема ниту Шинтерска служба, ниту азил за згрижување животни, ниту обучен персонал за оваа проблематика, што во развиениот свет одамна е пракса. Таму дури постои и посебна полиција за животни, која води грижа како за домашните миленици и односот на нивните сопственици кон нив, така и за кучињата и мачки скитници, но и за проблеми со разни диви животни кои некогаш знаат да залутаат во градските средини. Како сето ова функционира надлежните можат да погледнат на „Animal Planet“ каналот кој го вратат речиси сите кабелски оператори. Некој ќе рече, па кај нас за луѓето не се води сметка кои се дават во сиромаштија, уште за животните да се грижиме. Но дали ние воопшто се грижиме за нешто одговорно?
Горан Момироски
