Од музеј во јужна Германија е украдена поголема количина стари златници што датираат од околу 100-та година пред нашата ера, извести денеска полицијата.
Загубата на келтското богатство е катастрофа. Како сведоци на нашата историја, златниците се незаменливи! Крадците покажале неверојатна криминална енергија, изјави министерот за наука и уметност на германската покраина Баварија, Маркус Блуме.
Надлежните соопштија дека златниците биле украдени од Келтскиот музеј во Манхинг, 60 километри северно од Минхен. Тие 483 златни парички се откриени во 1999 година за време на ископувањето на древната населба во областа и се сметаат за најголемото откритие на келтско злато од 20 век. Полицијата повикува сведоците кои можеби виделе сомнителни лица во близина на музејот или имаат други информации што би можеле да доведат до пронаоѓање на богатството, да ги контактираат властите.
Германските органи ја проценуваат вредноста на златниците, кои тежат вкупно околу четири килограми – на неколку милиони евра.
OhridNews
