Од утре, по добивање на проект и надзор од страна на локалната самоуправа ќе започне заштитата на цевководот од колекторскиот систем кај с.Елешец, соопшти Координативното тело за превенција на последици од природните непогоди по состанокот одржан денескa, на кој беа координирани активностите за превенција кои ќе бидат преземени.
Кај месноста Луково, кај патниот правец Струга – Дебар продолжуваат активностите за уредување на коритото на реката Црн Дрим, каде екипи на Дирекцијата за заштита и спасување работат во 3 смени.
Во населеното место Пласница екипи на Дирекцијата за заштита прават насип на р. Треска со цел спречување на излевање на водата.
Според информациите од релевантните институции, сообраќајот на магистралните и регионалните патни правци низ државата се одвива без застои и ограничувања. На патниот правец Ресен – Битола преку планинскиот превој Ѓавато возилата се пренасочуваат преку регионалниот пат Р106 Ресен – Битола во должина од околу 5 километри.
Според Управата за хидрометеоролошки работи, до крајот на денешниот ден ќе се задржи променливо облачно време со повремени врнежи, претежно од снег, а утре претпладне се предвидува облачно време со локални врнежи од снег, додека попладнето е предвидено намалување на облачноста.
