Со цел да се изнајдат решенија за справување со зачестената појава на вандалско уништување на имотите во детските градинки и училиштата, вчера во општина Охрид се одржа координативен состанок помеѓу претставници на СВР Охрид, претседатели на Урбаните заедници, директорите на основни училишта и детската градинка ЈОУДГ „Јасна Ристеска“.
На состанокот било договорено да се зајакнат полициските патроли особено во вечерните часови, во близина на градинките и училиштата, а особено на местата кои се познати како собиралишта на млади луѓе со асоцијални појави. Во тој сегмент било заклучено дека потребно е да се организираат и состаноци помеѓу урбаните заедници, полицијата, училиштата и градинките.
Општина Охрид во рамките на своите надлежности потребно е да вложи напори за подобро осветлување на училиштата и градинките и поставување на видео надзор. Со тоа ќе се овозможи поголема прегледност во околината на објектите, што е можност за вклучување на граѓаните, кои доколку видат некое незаконско дејство, веднаш да го пријават во полицијата.
Исто така на средбата било заклучено дека потребна е поголема вклученост на јавноста и подигнување на јавната свест на граѓаните за надминување на овој проблем.
OhridNews
