Пуштен во употреба нoвиот ехо апарат наменет за секојдневна дијагностика, ехокардиографија и ехо колор доплер на периферни артерии и вени во ЈЗУ Специјализирана болница за превенција, лекување и рехабилитација на кардиоваскуларни заболувања во Охрид.
Ехо апаратот е наменет за Одделот за ултрасонографски иследувања за кардиоваскуларни заболувања кај амбулантски и болнички прегледи, како и за пациенти од кардиоваскуларната рехабилитација, информираше министерот за здравство Беким Сали.
Во Одделот се врши дијагностицирање на одделни видови на кардиоваскуларни заболувања, следење на веќе дијагностицирани заболувања, следење после кардиоваскуларни интервенции и операции и превентивни иследувања на високо ризична популација. Знаејќи ја спецификата на оваа Установа со која проблематика најмногу се ангажирани и се многу успешни пристапивме кон соработка и поддржување за усовршување на нивната дијагностика и секако за пружање на услуги за поголем број пациенти во овој регион, потенцираше Сали.
Нашата установа преку Министертвото за здравство доби еден современ ехо апарат кој ги има сите современи перформанси, вели директорката на установата Д-р Елена Коваческа Башуроска.
Ехо апаратот го користиме во секојдневната дијагностика, ехокардиографија и ехо колор доплер на периферни артерии и вени. Со оглед дека нашата установа работи како Регионален центар со голема бројка на пациенти, на годишно ниво достигнуваме и до десет илјади ехокардиографски прегледи и шест илјади ехо колор доплер прегледи. Овој апарат ќе придонесе за подобрување на квалитетот на медицинските услуги, како и воведување на нови процедури согласно можностите со еден ваков современ апарат, додава Коваческа Башуроска.
Се работи за опрема која има материјална вредност од околу 200 илјади евра, а истата е обезбедена во соработка со Светска банка, преку проект кој Министерството за здравство го работеше минатата година за обезбедување модерна современа опрема, дигитализирана, воглавно дијагностичка апаратура за 14 јавни здравствени установи, меѓу нив и Кардиолошкиот центар во Охрид.
Следна фаза како што посочи министерот Сали е опремување на операциони сали кои ќе бидат спремни за соочување со сите потреби, со цел децентрализирање на здравствените услуги кои се даваат во Клиничкиот центар во Скопје.
Инаку, во септември во Кардиолошкиот центар во Охрид беше пуштен во употреба нов ангиограф кој како што беше потенцирано е многу значаен за секојдневната работа на Установата.
Н.С.Ј.
