Секоја година во текот на месеците мај и октомври, се спроведува сообраќајно- воспитната акција ,,Поголема безбедност на пешаците, велосипедистите и моторциклистите во сообраќајот“, која има за цел подигнување на нивото на безбедност на учесниците во сообраќајот. По тој повод во текот на овој месец во Охрид засилена ќе биде контролата на улиците, со акцент на раскрсниците и булеварите, а ќе биде направен и поцелосен увид на постојната хоризонтална и вертикална сигнализација, информираат од СВР Охрид.
Носители на активностите на оваа акција се Републичкиот и Општинските совети за безбедност на сообраќајот на патиштата кои имаат изготвено програма за успешно спроведување на акцијата. Во реализацијата учество ќе земат и полициски службеници од Полициските станици за безбедност на патниот сообраќај при МВР на РМ.
Заради популаризирање и омасовување на оваа акција, претставници на општинските совети за безбедност и претставници на сообраќајната полиција ќе остварат контакт со воспитно-образовните институции со цел превентивно делување и укажување на опасностите од неправилното движење на децата односно пешаците и опасностите од неправилно управување на велосипеди и моторцикли, соопшти МВР.
OHRIDNEWS
