Независниот советник, Петре Петрески Калимеро, поднесе иницијатива седниците на Советот на општина Охрид во иднина да бидат директно пренесувани на една од локалните телевизии.

“Бидејќи работата на Советот е јавна и транспарентна, а советниците се избрани од граѓаните да ги штитат нивните интереси, добро е седниците да бидат директно пренесувани на медиумите, со што ќе се подигне ефикасноста на Советот и ќе се подигне дигнитетот како на институцијата, така и на советниците“, смета Калимеро.

На тој начин, додава советникот Петрески, ќе се одбегнат и новинарските шпекулации, а седниците ќе се документираат на аудио-визуелен начин и ќе бидат секогаш достапни во архивата. Калимеро смета дека директниот пренос на седниците од Советот, нема да го оптовари општинскиот буџет повеќе од еден советнички паушал месечно.

Калимеро очекува одлуката да биде прифатена од неговите колеги и најави дека предлогот за директен пренос од седниците на Советот ќе го постави на дневен ред на една од наредните седници.

Инаку ефикасноста на Советот во последно време е се` помала. Советниците и покрај координациите на седниците губат по час или два само за утврдување на дневниот ред, а голем број од предвидените точки поради недоразбирањата се одложуваат. Ќе промени ли нешто директниот пренос од седниците?