Какво е временото обележување на „Јане Сандански“?

Граѓаните на Охрид реагираат на начинот на кој е извршена промената во режимот на сообраќај на улицата „Јане Сандански“, пред градилиштето каде се копаат темели за нова зграда.

Читателот Горан Ангеловски, кој за себе вели дека има познавање од оваа област, смета дека надлежните служби не го процениле добро ризикот од изградбата на објектот, а кога станало очигледно што се случува поставиле несоодветна хоризонтална сигнализација.

Според него доколку се работи за времено обележување на коловозот, а воедно и негово стеснување, истиот требало да биде обележан со жолта или портокалова боја, како и да се постават соодветни патокази, како што тоа се прави во светот.

Од локалната самоуправа најавија дека промената на режимот на сообраќај на улицата „Јане Сандански“ е од времен карактер и дека по изградбата на потпорниот ѕид и обезбедувањето на коловозот, сообраќајот ќе се нормализира.