Претседателот на Република Македонија д-р Ѓорге Иванов денеска ќе престојува во Париз, како покровител на научниот проект посветен на патеписецот Евлија Челеби, кој се одржува во рамките на Алијансата меѓу Цивилизациите, во која активно учество има и нашата земја.
Претседателот Иванов ќе ја прогласи за отворена големата изложба на дела “Отоманскиот патописец: Евлија Челеби” на Институтот за Арапски свет, додека на меѓународниот научен симпозиум „Евлија Челеби, отоманскиот патописец од 17-от век и Европа во негово време“ ќе учествува делегација на МАНУ во состав академик Георги Старделов, претседател на МАНУ, академик Владо Камбовски и проф. д-р Нуман Аруч.
Меѓународниот симпозиум кој е во организација на Националниот институт за ориентални јазици и цивилизации (ИНАЛКО), Турската национална комисија на УНЕСКО и Центарот за истражување на цивилизациите при Универзитетот Бахчешехир во Истанбул е еден од трите големи научни симпозиуми со научници од целиот свет кој ќе се одржат во Париз, Скопје и Истанбул. Претседателот Иванов ќе биде покровител на проектот и на научниот симпозиум кој во април, 2012 година ќе се одржи во Скопје.
Претседателот Иванов во рамки на посетата на Париз ќе оствари средба со Ирина Бокова, Генерален директор на УНЕСКО.
