Истрагата за бродската несреќа што на 5-ти септември се случи на Охридското Езеро, е при крај. Истражните органи информираат дека поголемиот дел од сведоците и лицата кои имаат корисни информации за несреќата се сослушани. Останува да се сослушаат само уште неколку лица, по што треба да се состане мешовитата комисија во која партиципират вешти лица од Хрватска и Словенија кои се дел од истрагата.Се очекува деновиве да биде одреден терминот на средбата на која ќе бидат сублимирани сите докази по што официјално ќе бидат соопштени причините за потонувањето на бродот „Илинден“.
Во несреќата што се случи на околу 300 метри од брегот во близина на авто кампот Елешец животот го загубија 15 туристи од Бугарија. Висока државна делегација и претставници на локалната самоуправа од Охрид присуствуваа на погребот на загинатите, а на иницијатива на граѓани се формира здружението „5-ти Септември“ кое покрена петиција за утврдување на вистината за бродската несреќа. За само неколку дена беа собрани 8000 потписи кои му се предадени на јавното обвинителство. На иницијатива на здружението на 17 октомври во катедралната црква Св. Софија ќе се одржи панихида за загинатите бугарски туристи на која ќе бидат поканети семејствата на жртвите во најголемата трагедија што некогаш се случила на Охридското Езеро.
Ohridnews
