Градоначалникот Петрески и ВМРО ДПМНЕ имаат различен концепт за развој на Охрид. Неговиот е голем град со урбанистичка експанзија, а ВМРО ДПМНЕ е за Охрид како туристички град со педесетина илјади жители, вели пратеникот и член на Извршниот комитет на ВМРО ДПМНЕ, Александар Николовски во интервјуто за OhridNews, прво за локален медиум по поразот на неговата партија на изборите за градоначалник. Тој ги отфрла обвинувањата дека Владата на ВМРО ДПМНЕ го опструира Охрид и намерно не дозволува општината да премине во втора фаза од децентрализацијата. Николовски обвинува дека Локалната самоуправа за 5 години го задолжило секое охридско семејство со по 800 евра и дека не соработува со Владата, поради што пропаднале бројни проекти. Пратеникот Николовски зборува и за долго очекуваниот Закон за Охрид, кој како што открива во интервјуто, ќе влезе во Собраниска процедура до 1 август.
OhridNews: Не сте многу присутен на локалната политичка сцена, ова е ваше прво интервју за некој од локалните медиуми по подолго време. Бевте дел од Изборниот штаб на ВМРО- ДПМНЕ на локалните избори кои вашата партија ги загуби. Оттогаш направени се доста промени во Општинскиот комитет на ВМРО ДПМНЕ, дел од постарите членови не се повеќе во раководните структури во огранокот, дел се разрешени и од директорските функции. Зошто не бевте повеќе присутен во јавноста во овој период и како гледате на сите овие промени?
А. Николовски: Јас сум подолго присутен на политичката сцена, 4 години сум пратеник и се концентрирам на моите активности во Собранието. Тоа е една од основните причини зошто јас во изминатата година практично немав интервју за локалните медиуми, иако излегував со изјави по однос на актуелни теми поврзани со градот. Сакав после локалните избори да оставиме малку простор во јавноста за таа сама да извлече заклучоци, затоа што имав чувство дека некои наши ставови кои ги наметнувавме, а сметаме дека се правилни, јавноста немаше доволно време да ги прифати како такви и не можевме ефектот да го видиме на минатите локални избори. За жал, после година дена од локалните избори гледаме дека најголем дел од ставовите кои ги предвидувавме се остваруваат. Тоа оди во корист на ВМРО ДПМНЕ како политичка партија, затоа што рејтингот на партијата на локално ниво расте, а тоа го покажуваат и интерните анкети кои ги спроведовме, но е на штета на градот, односно не е добро за работењето на локалната самоуправа.
Како што напоменавте, јас минатата година практично бев човекот кој што ја водеше целата архитектура на изборната кампања на Кирил Трендафилов Нанче и застанав со целиот капацитет позади таа кандидатура, бидејќи сметав дека нудиме нешто квалитетно за градот, не заради тоа што лично сметав дека помеѓу двата кандидати се работи за подобар или полош кандидат, туку заради тоа што сметав дека концептот за развој кој што го имаше Охрид во претходните четири години не одговара на она што сакаат да го видат граѓаните. Имено, јас често пати претходно кажував дека имаме два правци во кои што ќе го развиваме Охрид и двата се легитимни. Едниот е да го направиме Охрид град во кој што ќе живеат помеѓу 100 и 150 000 жители, што ни се случува сега, или вториот е да го задржиме Охрид онаков како што го познаваме со четириесетина до педесет илјади луѓе. Во првиот случај Охрид нема да е туристички град, заради тоа што доколку го направите целиот град со згради никој од Скопје кој живее во зграда не сака да дојде во Охрид и во зграда да го помине и својот одмор. Странците- уште помалку. Вториот начин на развој на градот е она што го знаеме за Охрид во последните 30- 40 години, а тоа е развој на градот како центар на туризмот не само за Македонија, туку и во поширокиот регион. Од Северна Грција, Јужна Албанија, Бугарија, Јужна Србија луѓето да доаѓаат во градот заради тоа што сакаат да ја видат автентичноста на Охрид. За жал, според начинот на кој што се развива, освен стариот дел на градот, другото го изгуби тоа што значеше лик на Охрид. Тоа беа двата концепти. Оваа локална самоуправа, овој градоначалник и овој Совет сосем легитимно го избраа првиот концепт, за тоа добија поддршка од граѓаните и тука ние не можеме ништо да оспоруваме, но ако продолжи вака да се развива градот ние ќе мора многу сериозно да размислуваме за неколку години за отварање на големи производствени капацитети во Охрид, за да имаат луѓето од што да живеат, затоа што туризмот очигледно умира.
Само еден пример ќе кажам. Од пред три или четири години најголем дел од граѓаните на Охрид, во кој има околу 10 000 луѓе кои не се постојано вработени, во текот на летната сезона ги преуредиле своите куќи, ги издаваат три месеци преку лето и еден месец околу Нова година и заработуваат во просек од 3-4000 евра. Доколку не се вработени со тие пари егзистираат преку годината, доколку се вработени со тие пари ги школуваат децата или купуваат нешто за дома. Сега, откако почна интензивно да се гради градот се повеќе луѓе кои не живеат во Охрид почнаа да си купуваат станови. Кога не живеат во тие станови ги даваат клучевите на роднини, комшии, со што неколкукратно се намалува бројот на гостите кои претходно се сместувале во приватното сместување и во хотелите. Дополнително затоа што не доаѓа приход во охридските семејства тие не инвестираат во своите куќи, не инвестираат во доопремување, што го спушта нивото на квалитет, и Охрид- во поглед на туризмот, од година во година пропаѓа.
И последната и најважна работа- за да се изградат нови објекти потребно е да се изгради инфраструктура. Нас ни се случи населбите каде традиционално живеат охриѓани, како делот околу Железничка, 15-ти Корпус, Лескоец, Велгошти и.т.н. уште да се инфраструктурно нерешени, а новите населби кои се градат во Охрид, каде исто така луѓето плаќаат комуналии, се инфраструктурно решени, но таму не живеат луѓе и практично парите со кои требало да се уреди овој дел од градот отишле да се уредува некој друг дел во кој што постојано не живеат луѓе, така што многукратно губи градот. Една година после локалните избори мислам дека сите се свесни за тоа, анкетите го покажуваат тоа, и тоа е една од основните причини поради што сакав да оставиме малку времето да ги покаже работите, затоа што ако зборувате од партиски аспект луѓето често добиваат одбојност или се прашуваат – може ли да има некаков партиски интерес од целата оваа работа. Сега мислам дека постои простор за повторно активирање и отварање на овие теми.
Споменавте имаме промени во рамки на Општинскиот комитет. Ние имаме сопствени грешки, кои што ги увидовме, кои што ги знаеме и кои што се јасни и ние не бегаме од сопствените грешки и од сопствената одговорност. Затоа решивме да направиме промени и во локалното раководство и во пристапот кон работата. Секако и во претходните раководства има квалитетни луѓе кои посветено работеле. Но, квалитет на една политичка структура е доколку недостатоците ги подобрува и се обидува да ги надополни со подобри политики. Наша основна цел не е само победа на следните парламентарни избори кои што ќе бидат за две години, туку е и нудење и на еден подобар квалитет во градот, затоа што ние сме власт и на Централно ниво.
OhridNews: На што се должат тогаш промените на директорите и раководителите на институции и служби во градот, кои се под надлежност на джавата?
А. Николовски: Би сакал јасно тука да ставам до знаење дека од раководителите или директорите на институциите кои функционираат во градот, најголем дел се членови на ВМРО ДПМНЕ, но тие одговараат пред институциите во кои што работаат. ВМРО ДПМНЕ, направи и прави проценка на своите кадри по три основи. Првиот и најважен – дали имаат резултати во својата работа, што го оценува институцијата во која работаат. Второ, каков е впечатокот во јавноста за тие луѓе, затоа што некој може да работи одлично, а граѓаните да не го знаат тоа, односно да нема бенефит и трето, колку се чесни во својата работа, односно дали има знаци на злоупотреба на власта. Овие три критериуми се основа според која се проценува дали одреден раководител или висок претставник на власта на локално ниво, ја остварува функцијата добро или не. И тоа е добро што го правиме. Нормално е и после 4 години некои луѓе да се заморат или да не покажуваат резултат, така што не е ништо трагично што правиме промени. Јас знам дека е чудно бидејќи ниедна власт претходно, ниту СДСМ или ВМРО ДПМНЕ не правела вакви чекори, ние сме пионери во ова, но мислам дека за неколку години ова ако го прават и од СДСМ, луѓето ќе се навикнат.
OhridNews: Има ли меѓу директорите и раководителите заштитени, личности зад кои директно стои власта, како што се шпекулира во јавноста?
А. Николовски: Најдиректно ќе одговорам дека во ВМРО ДПМНЕ никој не е заштитен, почнувајќи од членовите на Извршниот комитет, тука сум и јас, највисокото раководство на партијата, завршувајќи со најниските структури. Почнувајќи од министрите, пратениците, завршувајќи со раководителите на сектори, секој што чесно си ја работи работата може да смета на понатамошна поддршка и на Владата и на партијата. Секој оној кој што не успеал да даде соодветни резултати ќе одговара, заштитени нема, тоа време помина во ВМРО ДПМНЕ и основната причина поради која што ги направивме промените во 2004 година беше токму тоа- да нема такви појави. Свесен сум дека информациите од локално ниво малку потешко стигнуваат на централно, односно за да некој министер сфати дека некој негов директор или раководител на некоја установа потфрлил со резултатите треба малку повеќе време, затоа што побавно оди протокот на информации. Тоа можеби создава впечаток во јавноста дека некој е заштитен, но тоа не е така, впрочем и одредени промени кои што се случуваат во градот токму тоа го говорат. Можам и лично да кажам дека ниту јас, ниту претседателот на партијата, ниту претседателот на Општинскиот комитет може на некого да му гарантира дека ќе биде заштитен.
OhridNews: Деновиве актуелно прашање е состојбата во внатрешната пловидба. Минатата година ни се случи несреќата со бродот „Илинден“ која испрати лоша порака во светот. Сега имаме забрана за пловидба на патничките бродови што исто така негативно се одразува на туризмот. Законот е јасен, но дали можеше сето ова да се реши пред туристичката сезона и дали некој ќе одговара за тоа?
А. Николовски: Целата оваа ситуација има два дела. По однос на законскиот дел, јасно е дека законот мора да се почитува. Непочитувањето на законот не значи само уривање на правната држава, често може да значи и други последици како што беше и минатогодишниот случај, за кој што јас не сакам предвреме да судам, ќе си пресуди судот, но очигледно е дека имало одредени пропусти во дел од законската регулатива. Тука мора да сме јасни за да не ни се случуваат понатаму настани кои никој не ги посакува.
Вториот дел се однесува на бродовите кои пловат на Охридското Езеро. Тие се гордост за туризмот, претставуваат една убава слика. Со нив стопанисуваат вредни луѓе кои што практично во најголем дел живеат и егзистираат од тоа и мислам дека секој од нив сака чесно да си ја работи работата и да си ја заработува платата. Во постојана комуникација сме, иако морам да кажам дека за проблемот разбрав од медиумите. Имаме дневна комуникација и се обидуваме да изнајдеме решение, но една работа мора да е јасна и тука нема да има отстапување, а тоа е дека законот мора да се почитува, не затоа што така сака Владата, министерот или јас, туку заради тоа што тоа се прописи кои што треба да функционират заради сигурноста на граѓаните. Мора да се најде решение кое ќе биде во рамки на законот.
Во однос на езерото, очигледно има недостатоци. Ние немаме море, па Охридското Езеро многу често го доживуваме како море, па се возат брзи чамци и скутери какви што на ниту едно друго езеро не можете да видите. Пример ќе го земам Женевското Езеро кое е слично на Охридското, а не можете да најдете такви пловни објекти таму. Малку се знае во јавноста дека иницијативата за забрана за пловидба на скутерите е донесена на моја иницијатива. Минатата година јас ја предложив до министерството за транспорт и врски и сметам дека е добро што во шпицот на сезоната од 20-ти јули до 20-ти август во најфреквентното време од 11 до 18 часот тие моќни машини не пловат, затоа што ја загрозуваат безбедноста на капачите. Сметам дека дополнително треба да ги заостриме мерките во внатрешната пловидба, јасно да се стават граници кој може да плови, до која јачина на мотори можат да пловат и сметам дека многу е подобро на Охридското Езеро наместо глисери кои се ужасно брзи, да се развива едриличарството.
OhridNews: Развојот на туризмот во Охрид директно зависи од изградбата на инфраструктурата. На аеродромот во Охрид кој од неодамна има нов концесионер не слетуваат многу патници, но она што најмногу загрижува се лошите патишта. Кога Охрид ќе биде поврзан автопатски и кога ќе се изгради регионалниот пат кон Св. Наум?
А. Николоски: Се прават големи напори во последните години да ја подобриме инфраструктурата. За жал во Македонија 25-30 години, од осумдесетите години кога имало последен бран на такви инвестиции во поранешна Југославија, немало ништо посериозно се до овој период. Презедовме многу активности, но за жал територијата на Македонија се уште не е покриена со соодветна водоводна и канализациона мрежа и локални патишта. Тоа е работа на општините, но ние сме свесни дека општините често немаат средства да го прават тоа и заради тоа зедовме кредит од Светската и од Европската банка за обнова и развој за подобрување на водоводната и канализационата мрежа и локалните патишта. Веќе во Охрид се инвестираат средства во болничкиот комплекс за канализациона мрежа, во Лескоец исто така за канализациона мрежа, водоводна мрежа во неколку места, меѓу кои Лескоец, Велгошти, одреден дел кај Лакочереј, неколку помалечки села на потегот Охрид – Пештани, а некаде на есен треба да стартува изградбата и на неколку лококални патишта. Тоа е патот од „Жито леб“ до центарот на Велгошти кој заради поставување на канализационата мрежа од страна на локалната самоуправа беше уништен и треба да се обнови, патот од населбата „Радојца Новичиќ“ до Горно и Долно Лакочереј, патот до Скребатно, Коњско и Орман, тоа се пет патишта кои оваа година ќе ги почнеме.
„Железничка“ ја завршуваме, тоа ќе биде втор булевар и по некоја случајност двата булевари во Охрид ги гради ВМРО ДПМНЕ, „Туристичка“ ја изградивме во минатиот мандат. Сакаме да инвестираме и понатаму, но имаме објективен проблем заради светската економска криза не само заради намалување на средствата во буџетот, туку и поради помалиот број на инвеститори кои што сакаат да вложат средства преку кредити или концесија.
Што се однесува до крупните работи, охридскиот аеродром, тој е под концесија на ТАВ и веќе се забележуваат промени. Само во јуни повеќе од двојно е зголемен бројот на патници од 1. 900 патници во 2009 година на 4. 100 патници во 2010 година, така што се гледа една значајна разлика, иако не е тоа доволно. Јас би сакал месечно на охридскиот аеродром да слетуваат помеѓу 30 до 40 000 патници со што би имале годишно околу половина милион патници што е основна цел и на ТАВ и сигурен сум дека тоа ќе го направат, бидејќи во трите аеродроми- охридскиот, скопскиот и аеродромот во Штип, кој треба да го изградат, вложуваат 200 милиони евра и тие мора од некаде да ги извадат, така што се апсолутно мотивирани.
По однос на автопатиштата, во моментов е во разработка план за давање под концесија на патиштата и некаде на крајот од годината потегот Гостивар – Струга – Охрид и Охрид – Ресен -Битола – Прилеп ќе бидат дадени под концесија. Двата правци се во должина од околу 120 километри. Еден километар автопат во зависност од теренот чини во просек од 3- 5 милиони евра. Три милиони доколку е рамно, пет милиони евра доколку треба да градите тунели и слично, што значи дека само потегот од Гостивар до Охрид чини некаде околу 500 милиони евра. За да биде рентабилен еден пат со наплаќање патарини потребно е дневно да поминуваат по 10 000 возила. На најфреквентниот пат Гостивар – Скопје дневно поминуваат до 6000 возила што значи тоа е 4000 помалку од тоа што е потребно и никој не се одлучува да гради затоа што не може да си ги повлече средствата. Затоа одлучивме како Влада да ги дадеме патиштата под концесија и концесионерот ќе работи заеднички со владата. Тоа значи дека делот кој што е непрофитабилен од тие 4000 возила ќе го инвестира владата, што значи дека покрај инвестицијата од концесионерот кој ќе стопанисува со патиштата 20-25 години, ќе има сериозна инвестиција и од државата. Ако се добро заврши, а мислам добро ќе заврши, најбрзо ќе се изгради автопатот од Охрид до Гостивар и некаде за три години од границата со Србија до Св. Наум ќе има автопат.
OhridNews: Вашите колеги од опозицијата, меѓу кои и охридскиот пратеник Томе Чингоски ја критикуваат идејата за изградба на патиштата по принципот на концесија и сметаат дека е многу подобро нив да ги изгради и со нив да стопанисува државата?
А. Николовски: Тоа е прашање на концепт и морален кредибилитет, бидејќи 30 години во Македонија не се инвестирало во изградба на патишта, а најголем дел во изминатите 16 години на власт е СДСМ и имала можност да ги примени своите концепти. Целиот инвестиционен проект за изградба на автопатишта во Македонија чини околу 1,2 милијарди евра. За споредба вкупниот буџет на државата е 2,4 милијарди евра, од што реални инвестиции во инфраструктура се околу 350 милиони евра. Значи треба 4 години да не се инвестира во болници, во локални патишта, култура, а единствено да се инвестира само во автопатишта со огромен прашалник дека некоја година може да има потфрлање во буџетот. Кога имате концесионер во негов интерес е што побрзо да ги изгради патиштата за да има повеќе време да ги поврати парите, за што е потребно 25- до 30 години и доколку се инвестира од буџетот тоа би било катастрофа, затоа што толку години буџетот ќе биде оптоварен. Затоа го избравме концептот на концесионирање кој го применуваат најголемиот број од државите. Во соседството спротивниот концепт го избра единствено Хрватска која сега има сериозни проблеми заради тоа.
OhridNews: Како ги оценувате односите помеѓу локалната и централната власт. Општината отворено забележува дека нема комуникација, дека Охрид намерно се опструира и дека државата не сака успешен градоначалник затоа што тој е од друга политичка опција?
А. Николовски: ВМРО ДПМНЕ има посебен однос кон Охрид и тоа го знаат граѓаните на Охрид. Наш интерес е да се развива градот, не од политички причини, туку затоа што навистина го сакаме градот и тој е поврзан со традицијата и идеологијата на партијата. За споредба во Охрид годишно се инвестираат онолку средства колку што се инвестираат во сите други општини заедно, без градот Скопје и тука не гледам дека има опструкција. Напротив, мислам дека другите општини се опструирани. Би биле среќни доколку Охрид има функционална и успешна локална самопуправа така што на тој начин напорите на владата дополнително би биле поддржани. Ние многу често не сме во состојба да инвестираме во Охрид заради опструкции од локалната самоуправа. Дали е проблем градоначалникот, дали е проблем СДСМ или структурите околу градоначалникот, факт е дека не секогаш добиваме онолку брз одговор колку што очекуваме.
На пример булеварот „Железничка“ ќе беше многу побрзо завршен да имавме соработка со локалната самоуправа бидејќи повеќе од година и пол се занимававме со решавање на имотно правни прашања што општината можеше да ги реши за месец или два, затоа што не трошеше средства бидејќи сите средства беа од буџетот, требаше само да се завршат процедурите. Понатаму, дел од средствата во висина од околу 5 милиони денари за изградба на патишта во Коњско и Велгошти не се потрошија, затоа што општината не најде начин да ги реализира. Концептот кој што го имаме за развој на спортскиот центар не можеме три години да го реализираме затоа што локалната не го носи Деталниот урбанистички план. Охрид загуби затворен базен само заради инаетот на градоначалникот. Тоа се факти, но ние се обидуваме без разлика на разликите кои ги имаме да имаме што подобра соработка.
Нашите министри се обидуваат да остварат дневна комуникација со градоначалникот, кој тоа го злоупотребува како некое пријателство или за остварување на други интереси, што не е вистина бидејќи нашите министри така комуницираат со сите градоначалници. Иако, имаме сосем спротивен концепт за развој на градот, што го спомнав на почетокот на интервјуто, ние сме за мал туристички град, а градоначалникот за голем град со голема урбана експанзија и тука нема никогаш да се согласиме, тоа не значи дека нема да соработуваме. Ние имаме подадена рака. Петта година Александар Петрески е градоначалник, четврта година ВМРО ДПМНЕ е на власт на централно ниво и ние сакале или не мора да соработуваме и мислам дека ќе е многу попријатно за соработка доколку општината нуди повеќе проекти до владата, што не го прави во моментов. И второ- обидот за дневно политичко поентирање преку обвинување на еден или друг да се тргне на страна, бидејќи не може за сите неуспеси на општината да е виновна Владата, а за сите успеси да е одговорна само општината, затоа што Охрид не е единствена општина. Доколку тоа се случува во сите општини би било катастрофа.
OhridNews: Го имате ли предвид фактот дека Охрид се уште не е влезен во втора фаза на децентрализација и дека всушност најголемата забелешка на локалната е таа дека на Охрид намерно не му се дозволува да влезе во втора фаза на децентрализација?
А. Николовски: Во политиката воопшто нема целосно црни и целосно бели ситуации. Не мислам дека за неуспесите во Охрид целосно се одговорни ВМРО ДПМНЕ и Владата, како што не мислам и дека за неуспесите во Охрид целосно се одговорни само СДСМ и локалната самоуправа. Истото е и со остварените успеси. Тоа е комбинација. Охрид без Охридско лето е незамислив, тоа е проект на Министерството за култура, но и Охрид без добро решена инфраструктура и без добро решено паркирање е исто така незамислив, а тоа е обврска на локалната самоуправа.
Во однос на вторта фаза на децентрализација има многу сериозен момент и ќе изнесам едно обвинување за кое што би сакал да бидам демантиран. Охрид во моментов должи над 10 милиони евра. Тоа е континуиран долг кој се провлекува 5 години во Охрид. Тоа значи дека имајќи предвид дека во Охрид живеат 50 000 жители, секој жител во просек должи по 200 евра, односно секое семејство должи по 800 евра. Значи градоначалникот во овие пет години на секое семејство во градот успеал да му направи по 800 евра долг.
Мислам дека долгот не се надмирува од две причини. Првата е заради тоа што постојано се напаѓа Владата дека состојбите во Охрид се такви какви што се заради долгот, а втората е од финансиски причини. Доколку Охрид ги подмири своите долгови ќе влезе во втора фаза на децентрализација, која колку што значи привилегија, значи и обврска. Тоа значи менаџирање со многу повеќе работи од кои сега менаџира градот. Тоа значи добивање повеќе средства отколку што сега има градот, отворање на фондови кои сега се затворени, а за сето тоа треба успешна општинска управа за која што сметам дека сега не е подготвена, бидејќи имаме администрација која што не зборува странски јазици, а во туристички град не може да биде така. Второ, доколку се пресмета основицата и каматата на долгот ќе се видат многу интересни податоци зошто Охрид можеби не се раздолжува. Охрид е град во кој што се градат најмногу згради и каде има најмногу инвестиции во урбанизмот статистички гледано. Сите градови, минус Скопје, градат помалку од Охрид сам, а Охрид има финансиски проблеми. На пример, Штип, Прилеп, Струмица немаат проблеми, а годишно таму се градат една до две згради. Нема логика да влегуваат толку комуналии во градот, а од друга страна толку малку се инвестира. Ние не видовме ниту еден капитален проект во овие пет години. Немаме нов плоштад, нов театар, нова здравствена установа или училиште, а во исто време има толкав долг, така што тоа не треба јас да го одговорам, туку општината.
OhridNews: Општината укажува дека наследила долгови од над 15 милиони евра од ВМРО ДПМНЕ и дека таа ги сервисира истите. Бара да и се дозволи кредитно задолжување за да го расчисти долгот?
А. Николовски: Во однос на задолжувањето, факт е дека долгот се влече долго време и тука би сакал да кажам две работи. Прво, наш интерес е Охрид да влезе во втора фаза на децентрализација, заради односот кој го имаме кон градот. Но, тоа не може доколку локалната самоуправа не си ги исполни обврските. Јас сум еден од луѓето, тоа го знаат и од локалната, кој најмногу лобира тоа да се случи. Доколку Охрид одреди одржлив концепт за тоа – на кој начин има намера да го врати долгот и каде е тука поддршката која државата би можела да ја даде, но во реални рамки, затоа што ниту локалната ниту државата се претпријатија кои земаат комерцијални кредити, туку се работи за поинаква структура и тука не треба да се залажува јавноста, државата е спремна да се дефинансира долгот. Но, но не може да сакате да направите дефинансирање на долгот, доколку постојано создавате нов.
Втора работа која мислам дека е прашање повеќе на човечки карактер и принципиелност- мислам дека не е фер да се кажува дека ВМРО ДПМНЕ како политичка партија оставила долг на овој градоначалник, од две причини. Прво- во периодот кога кандидатот од ВМРО ДПМНЕ беше градоначалник до 2005 година, децентрализацијата не беше воведена. Градоначалниците беа нешто на ниво на претседатели на општини и ги немаа ингеренциите како сега. Втора работа- ќе ги потсетам граѓаните на Охрид дека претходниот градоначалник најголемиот дел од мандатот дејствуваше како независен градоначалник, се откажа од партијата, и кажа дека не е градоначалник на партија, туку на Охрид, така да ВМРО ДПМНЕ како политичка партија нема на ниту еден начин одговорност за градот бидејќи ВМРО- ДПМНЕ од 20 год ини самостојност во Охрид не била на власт подолго од една година.
Не е фер од Александар Петрески на тој начин да се однесува кон претходниот градоначалник од две причини. Прво- кариерата на сегашниот градоначалник започна во време на претходниот, кога беше директор на Комуналец, како кадар на СДСМ. Значи, ако со Охрид владееше ВМРО ДПМНЕ немаше да стави кадар од СДСМ за директор на најголемото општинско претпријатие. И второ- промоцијата на Александар Петрески во политиката ја направи токму претходниот градоначалник, со целосна подршка која ја имаше и на претходните и на овие избори. Така што, е многу нечесно и нечовечки да кон човек кој ве поддржува, наместо да искажете почит, или во најмала рака да не го споменувате, да го обвинувате за вашите неуспеси. И ако првиот пат кога се кандидирал Александар Петрески во 2005, не ја знаел состојбата во општината, иако бил дел од општинската организација, вториот пат многу добро знаеше за каква функција се кандидира, затоа што 4 години претходно беше градоначалник. А, ако знаел за што се кандидира, тогаш нема оправдување, значи свесно ја презел работата. Тоа е како да сте менаџер на несупешно претпријатие и сакате да сте менаџер и следните 4 години и при тоа го обвинувате претходното раководство. Не можете, затоа што вие 4 години на дневна основа ги знаете состојбите и знаете на што се нафаќате. Така да тоа се две работи кои зборуваат за некарактерна личност.
OhridNews: Веројатно голем дел од проблемите на Охрид би биле решени доколку се донесе Закон за Охрид, нешто за кое се зборува со години. Во претходниот состав на парламентот имаше најголем број пратеници од Охрид. Охриѓани се надеваа дека тогаш ќе помине таа иницијатива, но ништо. До каде е законот?
А. Николовски: Законот за Охрид е работа која е ветувана 20 години. Јас сметам дека требаше да биде донесен паралелно со осамостојувањето на државата и тогаш не би биле овие проблеми, кои сега ги имаме во градов. За да се донесе, претходно беше неопходно да се донесе Закон за охридскиот регион, што и се направи и втора работа- Менаџмент план за управување со културното и природно наследство во Охрид и охридско кој се работи во соработка со УНЕСКО. Тоа се работи кои се водеа преку две години. Врз основа на овие две бази се носи специјализиран Закон за Охрид за кој, еве можам ексклузивно да кажам дека пред годишните одмори кои почнуваат од 1 август ќе влезе во владина и собраниска процедура. Што значи до почетокот на септември ќе имаме специјализиран закон за Охрид.
OhridNews: Парламентот е актуелен подолг период, за жал по немилиот настан за кој јавноста секојдневно е сведок на силни препукувања на релација власт – опозиција. Испративме лоша порака која може негативно да влијае врз оценката за нашата земја на претстојниот Совет на министри на ЕУ. Како тоа ќе се одрази?
А. Николовски: За жал во Парламентот имаме една тензична ситуација подолг временски период, која по мое мислење е резултат на тоа што СДСМ со Бранко Црвенковски година и повеќе не успева да крене рејтинг поголем од 10% и тоа го знаат пратениците на СДСМ и знаат дека уште две или 6 години ќе бидат опозиција и тоа создава одредени тензии кај нив и ги разбирам. Но не можам да ги разберам за применување на физичка сила. Многу е јасно, од она што го видовме сите, дека пратениците од СДСМ нападнаа човек. Дали е полицаец или обичен човек, никому од нас пратенците не ни дава за право да нападнеме било кого. Тоа е некултурно, недостојно и недолично за позицијата која ја имаме. Ние очекуваме анкетната комисија да ја заврши својата работа.
Во однос на делот во кој имам ингеренции- деловникот. Самата опозиција постави барања, уште пред година дена ние ги прифативме сите, што не се случило до сега. И сега деловникот со сите прифатени барања на опозицијата, самата таа не сака да го гласа, што е крајно нелогична работа. Со новиот деловник и нивните барања, добиват 40% повеќе време за дискусија од претходно, однсоно 40% повеќе време за промоција на нивните ставови. Мислам дека основната причина е многу јасна , знаат дека деловникот е за добивање позитивно мислење од ЕУ и не сакаат да го изгласаат во собранието, затоа што на тој начин РМ не би добила позитивен извештај , но тогаш СДСМ ќе е јасно виновна. Мене тоа лично не ми е важно, важно ми е РМ да добие позитивен извештај. Ако не добие, тоа што СДСМ ќе биде виновна, нема да и промени на Македонија. Се надевам дека овие дена ќе успееме да го изгласаме деловникот.
OhridNews: Вие сте претседател и на Парламентарната делегација во Советот на Европа со кој во моментов претседава Македонија. Што може да очекуваме?
А. Николоски: Република Македонија за прв пат раководи со една меѓународна организација во Европа. Исто така за прв пат успеавме терминот македонски да го добиеме како придавка за државата за што сум посебно горд бидејќи лобирав заедно со министерот за надворешни работи. Многу битно за Македонија е и тоа што добивме многу пофалби за мултуетничноста, демократијата, борбата против корупцијата, реформите во судството, работи кои претходно беа во сенка на спорот за името кој го имаме со Грција. Исто така правиме голема промоција на државата. Во средината на септември токму во Охрид ќе дојдат преку 100 пратеници од национални Собранија од Европа, а промоција на Охрид и Македонија има и во Стразбур.
OhridNews: Ќе имате ли време за одмор покрај сите активности?
А. Николоски: Веројатно неколку дена ќе одморам во август. Можеби некој ден ќе минам и на море, но не во Грција, ќе видиме.
