Честа слика во центарот на Охрид
– Секоја идеја која значи разубавување на Охрид и придонесува за негово презентирање и доживување во вистинско светло како ГРАД НА СВЕТЛОСТА и туристички центар, заслужува внимание и поддршка. Во ваквите размислувања, идеи и нивна поддршка, вклучително, се вбројува и идејата за која Ohridnews ја спроведе анкетата, вели портпаролот на општина Охрид Никола Маневски.
Според него Охрид, особено неговото централно јадро треба да имаат зданија со уредени фасади било да се семејни куќи или станбени згради.
– Навистина, ги има оние кои ќе укажат дека сето тоа ги чини дополнителни средства, но покрај обврската која произлегува од актуелните законски решенија, кога станува збор за Охрид и фасадите во него не треба да се испушти од предвид фактот дека покрај се, живеењето во Охрид има свои привилегии па оттука и повеќе издатоци за урбанистичката или градежна уреденост. Ако Охрид вистински се сака, се посакува за бизнис или живеење, тогаш мора нешто и да се жртвува за таа определба. Впрочем, се што се инвестира во Охрид е инвестиција која на некој начин се исплатува и враќа со корист, посочува Маневски.
Ова прашање се уредува со новиот закон за градба, со кој се предвидуваат високи казни за сопствениците на нефасадираните објекти и до 3000 евра. Ваквата мерка според дел од стручната јавност е екстремна и нема да може да заживее во стварност затоа што македонските граѓани не се финансиски моќни и нема да можат да одговорат на новата законска обврска.
