Невладината „Анима Мунди“ денеска јавно ги прозва институциите во државата, дека не си ја вршат својата работа и ги игнорираат пријавите за малтретирање на животни и флагрантното кршење на законите. Посочен е примерот во Куманово, каде хаска служи како плен за тренинг на шарпланинци за борби, за пријавеното лице кое врши лов на животни со азијати и во заробеништво чува мало мече, како и повеќе други случаи на тепање и малтретирање животни.
Додека граѓаните и активистите изигруваат полицајци и буквално сервираат доказен материјал и сведоштва за експлицитни случаи на насилство врз животните, институциите не преземаат ништо. Џабе пријави, џабе докази, џабе се, кога не постои никаков интерес кај оние кои се надлежни и платени да постапуваат, кои пријавите ги зафрлуваат чекајќи злоделата да бидат заборавени, зошто „секое чудо за два дена“. – велат од невладината „Анима Мунди“.
Здружението за заштита на животните бара институциите најитно да постапат по пријавите за малтретирање животни, посочувајќи дека непостапувањето значи злоупотреба на должноста и дава поттик на насилниците и понатаму да мачат, убиваат бидејќи поминуваат неказнети.
OhridNews
