На дводневниот собир, што го организираат Стопанската комора за информатички и комуникациски технологии и МАСИТ, околу 180 претставници на најголемите ИТ компании од Југоисточна Европа ќе дискутираат за најновите информатички достигнувања и развојот на ИТ- технологијата.
На присутните им се обрати вицепремиерот задолжен за економски прашања, Владимир Пешевски кој упати порака до македонските ИТ компании да ги обединат ресурсите за да бидат повеќе конкурентни на светскиот пазар.
– Било која компанија што сака да биде успешна и да се развива, мора да се шири надвор од држвните рамки. Во таа насока, големиот број ИТ проекти што се финансирани од Владата, но и во индустријата воопшто, треба да бидат подлога за создавање на партнерства меѓу македонските и странските компании, чии производи и услуги со многу повисока додадена вредност ќе бидат извезувани надвор од Македонија, истакна Пешевски.
ИТ конференцијата во Охрид претставува собир на сите асоцијации за информатичка и комуникациска технологија од регионот на Југоисточна Европа, на кој се разгледуваат постигнувањата, стратегиските правци на развојот и активностите во оваа исклучително развојна и инвестициски поттикнувачка дејност.
