Бизнисмен од Струмица ќе ги враќа холандските туристи на охридската ривиера. Васко Коцинов кој 19 години живее и работи во Холандија планира годишно Македонија да ја посетуваат околу 40 илјади холандски туристи. Тие ќе пристигнуваат со директни чартер летови на „Трансавиа“, ќерка на холандскиот национален превозник „КЛМ“, од Амстердам за Скопје и Охрид. Холандско-македонскиот туроператор „Каратанов турс“ најавува дека кон Охрид чартер лет ќе има во главната туристичка сезона, а во останиот дел кон Скопје. Доколку интересот ги оправда очекувањата „КЛМ“ ќе воведе и директна авио линија кон Македонија.
Новинари и туроператори од Холандија кои се во тридневна посета на Македонија, денеска во Охрид ќе се сретнат со македонските туроператори со цел да се запознаат со туристичките потенцијали, природните убавини и можностите за одмор што се нудат.
Според амбасадорот на Холандија во Македонија, Симоне Филипини, воведувањето на чартер линија е еден од главните предуслови за привлекување на холандските туристи, а Охрид посебно е интересен и поради споменикот на познатиот писател А. Ден Долард.
– Една од причините што Холанѓаните ја посетауваат Македонија е споменикот на холандскиот писател Ден А. Долард во Охрид. Тој живеел и пишувал за тој град, заради што Холанѓаните се фасционирани од Македонија, истакна амбасадорката на Холандија во Македонија, Симоне Филипини, на прес конференцијата што вчера се одржа во Скопје.
