Тур-операторот „Корендон“ –интернационал преку своето претставништво во Холандија направи фиксен закуп на капацитети во девет хотели на охридско-струшката ривиера, каде во периодот од 6 мај до 18 октомври идната година ќе престојуваат туристи од Холандија и земјите од Бенелукс.
Договорот во ноември бил постигнат со посредство на туристичката агенција „Фибула – ер травел“ , со кој според првичните проекции се предвидува седмично во Охрид да слетуваат два чартер, но и повеќе доколку интересот биде поголем.
Дончо Танески од Хотелската асоцијација на Македоија истакна дека при неодамнешниот престој во Македонија, претставниците на холандскиот оператор изразиле уверување дека ќе исполнат 90 отсто од авионските места и закупените капацитети, односно ќе донесат во Охрид и Струга 7.300 гости и реализираат 51.000 ноќевања.
– Атрактивноста на целата понуда е дотолку поголема покрај однапред гарантираните аранжмани, договорите се врз база ноќевање и појадок односно што гостите не се врзани за хотелските капацитети, што остава простор за заработка на сите останати субјекти инволвирани во туристичкиот бизнис, рече Танески, според кого целокупната зделка вреди околу 6 милиони евра.
Според договорот, туристите од Холандија ќе бидат сместени во хотелите „Макпетрол“, „Дрим“ и „Београд“ на струшкото крајбрежје и „Дончо“, „Дипломат“, „Силекс“, „Метропол“, „Турист“ и „Десарет“ на охридскиот дел на риверата, во вкупно 180 соби односно 360 легла. „Корендон“ во тек на 165 дена од наредната летна туристичка сезона ќе реализира 46 ротации на туристи, со максимална реализација на престој на 8.188 гости или 57.316 ноќевања.
OhridNews
