По неколку години откако во 2001-та Тоше Проески го освои Гран при-то на интернационалниот фестивал Славјански базар во Белорусија со „Тајно моја“, годинава талентираниот Боби Мојсовски и’ донесе нова победа на Македонија од овој реномиран фестивал, јавува „Макфакс“.
Во конкуренција на 20 учесници од 20 земји, со беспрекорната изведба на неговата „Те краде тој“, „Дождлива песна“ од Марјан Стојановски и „Њхатаѕа ѕоу њант фром ме” од Адам Ламберт, Боби Мојсовски ги освои симпатиите на публиката и стручното жири составено од 11 музички ѕвезди компетентни за оценување на вокалната техника, интерпретацијата и сценскиот настап на учесниците.
„Пресреќен сум што се враќам во родниот крај со Гран при од Белорусија. Да се учествува на еден ваков голем фестивал, пред публика и жири комисија која внимава на секој детаљ во оценувањето на квалитетот на изведувачите е предизвик и привилегија за секој музичар. Оваа награда е навистина посебна за мене и чест ми е што со неа го наследив мојот музички херој Тоше Проески“, изјавува Боби.
За изведбата на композициите заслужен беше и оркестарот на Михаил Финберг составен од стотина музичари со кој неколку дена пред фестивалот Мојсовски имаше проби. Восхитот на публиката и жирито за неговата вокална интерпретација за време на настапот на сцената во Витебск беа сигурен предзнак дека Боби ќе добие висок пласман.
Свеченото доделување на наградите ќе се случи во понеделникот, а Боби ќе се врати во Македонија за неколку дена кога ќе завршат сите активности поврзани со Славјански Базар кој важи за еден од највлијателните фестивали во светот.
OhridNews
