Туристите во Охрид ќе имаат квалитетна здравствена заштита. Домашните гости кои летниот период го минуваат во градот ќе добијат навремена и брза здравствена заштита, а хронично болните освен што ќе може да ги користат здравствените услуги, во аптеките ќе може да го набават лекот кој им е препишан од страна на нивните матични лекари, информира директорот на Фондот за здравствено осигурување , Сашо Стефаноски, кој денес заедно со директорот Орхан Рамадани ја посетија подрачната служба во Охрид.
– Странски гости, доколку имаат некаков здравствен проблем, преку Фондот за здравство ќе можат лесно да го остварат правото на здравствена заштита со едноставно пријавување во фондот и подигнување на двојазичниот образец ако се од земја со која имаме билатерален договор за здравствена заштита или да појдат во здравствена установа и ја добијат негата која им е потребна. Назначивме и лице за комуникација со странските туристи кое ќе зборува јазик од соседните земји како и англиски јазик, рече Стефаноски.
Тој напомена дека големо внимание се посветува и на снабденоста на аптеките во градот со лекови.
– Фондот има склучено договор со 27 аптеки кои имаат квоти, при што на најголем дел од нив им е зголемена квотата со последната дистрибуција на лекови. Во текот на денот ќе ја посетиме и аптеката во Пештани која е многу значајна во летниот период, рече Стефаноски.
Посетата на директорите на ФЗОМ во подрачната единица во Охрид е во рамки на проектот „ Директорите на ФЗОМ директно со осигурениците“ , при што директорите заедно со дел од стручниот тим на Фондот за здравство ги посетуваат подрачните служби, разговараќји со вработените и осигуренците со цел да се детектираат и отстранат евентуалните проблеми .
Т.К.
