Триото на светски познатиот гитарист од Охрид Дамјан Пејчиноски ја доби наградата “Excellence In Performance” на фестивалот на културата (China Cultural Season Festival) што се одржа во кинескиот град Ланжу. Наградата на Дамјан Пејчиноски му ја врачи првиот човек на градот.
-Почесени сме што ја добивме оваа награда заедно со другите наградени изведувачи на овој извонреден интернационален фестивал. Му благодариме на прекрасниот кинески народ, на организаторот и градот Ланжу за искажаната голема почит кон нас. Длабоко не допре вашата гостопримливост и дух. – истакна Дамјан Пејчиноски по добивањето на наградата.
Фестивалот во Ланжу се одржа од 6 до 11 јули под покровителство на министертвото за култура на Кина и кинеската џез асоцијација. Триото на Дамјан Пејчиноски се претстави со џез теми и македонски етно компонзиции во сопствен аранжман.
Настапот на Дамјан Пејчиноски трио предизвика големо внимание во тамошната јавност. По завршувањето на настапот Дамјан се дружеше со публиката која покажа голем интерес за неговата музика.
OhridNews
