Во рамките на проектот „Заштита на пештерските екосистеми и загрозените растителни и животински видови во Националниот парк Галичица од негативните ефекти на климатските промени“ се спроведуваат спелеолошки и биоспелеолошки истражувања на пештери во Националниот парк Галичица.
Во текот на овие истражувања, од 20 видови лилјаци регистирани во Националниот парк Галичица, 9 видови се забележани во пештерите во заштитеното подрачје, меѓу нив и голем потковичар и медитерански потковичар.
Голем потковичар е најголемиот претставник од лилјаците потковичари и има тежина од 17 до 34 грама и распон на крилја до 40 cm. Неговата популација е под голема закана од уништувањето на поволните живеалишта, вознемирување во засолништата и намалувањето на достапната храна, поради што е категоризиран како близу загрозен според Европската црвена листа на загрозени видови. Во Националниот парк Галичица, големиот потковичар е регистриран во Лескоечка Пештера, Мечкина Дупка, Бимбилова Пештера, Наумова Пештера и Црна Пешт.
Медитерански потковичар е средно голем лилјак, со тежина од 8 до 17 грама и истиот е категоризиран како заштитен вид според Листата на строго заштитени и заштитени диви видови од Законот за природа на Република Северна Македонија и е категоризиран како ранлив вид според Европската црвена листа на загрозени видови. Во Националниот парк Галичица, медитеранскиот потковичар е забележан во Лескоечка Пештера, Мечкина Дупка, Наумова Пештера и Црна Пешт.
Проектот „Заштита на пештерските екосистеми и загрозените растителни и животински видови во Националниот парк Галичица од негативните ефекти на климатските промени“ е поддржан од Prespa Ohrid Nature Trust – PONT, a го спроведуваат Црвен крст на Република Северна Македонија – Општинска организација Охрид и Истражувачко друштво „Урсус спелеос“ – Скопје, во соработка со Национален парк Галичица.
OhridNews
