За прв пат, во Охрид ќе се одржи годишна изложба на Факултетот за арт и дизајн при Европскиот универзитет.
Студентите ќе ги претстават своите најнови креативни остварувања од областа на графичкиот дизајн, дизајнот на ентериер и модниот дизајн. По интензивната академска година, во која студентите веќе се презентираа на Биеналето на млади уметници од Европа и Медитеранот, Неделата на претприемништво, Модната недела во Скопје, Модната недела во Битола, Скопје Филм фестивал, Младинскиот пролетен салон и други настани, оваа изложба ќе ги сумира нивните дела од сите стручни предмети на студиите. Освен дела од додипломците, ќе бидат претставени и проекти на дипломираните студенти како и оние од постдипломските студии.
Изложбата ќе биде отворена на 14 јули во 20.00 часот, во Дом на култура “Григор Прличев”. На 15 Јули во 21.00 часот публиката ќе има можност да ја проследи модната ревија на студентите од моден дизајн на платото пред Домот на културата. Во деновите 15 и 16 Јули на Градскиот кеј со почеток од 11 часот ќе се одржи хепенинг во кој ќе учествуваат студентите и наставниот кадар на Факултетот за арт и дизајн. Изложбата трае до 16 јули.
