„Гладијаторите“ им се вратија на победите во Супер лигата

Ракометарите на Охрид им се вратија на победите во Супер лигата. Охриѓани три бодови на табелата прокнижија со триумфот над Вардар Јуниор во Скопје 29-18 (12-5) во првиот меч од од 13-та рунда во ракометната елита.

Добриот пристап и почеток на мечот на охридските ракометари им донесе контрола на играта и резултатот. „Гладијаторите“ поведоа со 5-2, а со серија 3-0 стигнаа до 8-2 и ја најавија победата. После триесет минути игра Охрид обезбеди предност од седум погодоци (12-5).

Охридските ракометари не остапија од силното темпо во второто полувреме. Продолжија во ист ритам и за многу кратко време стигнаа до двоцифрено водство. До крајот на мечот ја задржаа таа предност и славеа со +11 (29-18). За Охрид ова беше осми триумф сезонава.

Ракометарите на Охрид во вторник и четврток ќе ги заокружат мечевите во Супер лигата. Прво во СРЦ „Билјанини Извори“ гостува Борец, а потоа Радовиш.

OhridNews