Гитаристка од Охрид доби признание во Бугарија

Малата Георгина Балкоска, иако има само 12 години уште од најмала возраст се „дружи“ со омилениот инструмент – гитарата. Ученичката во петто одделение во „Григор Приличев“ неколку години свири на овој популарен инструмент, а од пред шест месеци е во „класични води“ кај професорот Александар Крстаноски.

Причината заради која ја посетивме додека беше на час во музичкото школо „Методи Патче“, е освоеното признание „Најмлад учесник“ на Меѓународниот натпревар и фестивал по класична гитара во градот Велинград, Бугарија.

Георгина не е многу зборлива, но за себе вели дека отсекогаш негувала посебна љубов кон гитарата и дека честопати заспивала заедно со неа. Од неодамна учи класика, но признава дека Клептон и Брајан Адамс со задоволство ги слуша и ги свири нивните песни.

Професорот Крстаноски за неа вели дека поседува талент и вештина на свирење. „Иако делува повлечено, сепак е многу упорна и вредна. Со работа и вежбање, сигурен сум дека ќе достигне високо ниво во иднина“ вели професор Крстаноски.

Георгина има прилика своето знаење да го прикаже и на вечерашниот годишен концерт (29. мај) , што го приредува ОМУ „Методи Патче“ во катедралната црква Света Софија – Охрид, каде ќе настапи заедно со 25 свои соученици.