Ученичката по гитара, тринаесетгодишната Анастасија Милеска од Основното музичко училиште „Методи Патче“ од Охрид, направи уште еден успех во низа, освојувајќи Втора награда на престижниот „Натпревар и фестивал на класична гитара“ што се одржа во Велинград, Бугарија.
Анастасија со своите две извонредни изведби на 22-ри и 23-ти Мај успеа да го „убеди“ меѓународното седумчлено жири дека го заслужува високото признание.
Младата гитаристка работи и напредува во класата на професорот по гитара Александар Крстаноски:
„Иако конкуренцијата на натпреварот беше голема (Анастасија се натпреваруваше со конкуренти од Бугарија, Германија, Македонија постари од неа две до три години, ученици во средните музички училишта) сепак Анастасија беше многу концентрирана и без ниту една грешка ги отсвири одбраните дела, кои не беа ни малку лесни“ – вели професорот Крстаноски.
Гитарата на Анастасија жнее успеси
Наградата освоена во Бугарија, иако скромна, е вистински поттик за Милеска да продолжи да се усовршува. Да потсетиме, Анастасија Милеска пред два месеци освои прва награда на натпревар одржан во Лесковац, Србија.
Спаско Костоски
